نظامیان تاجیکستان رزمایش گستردۀ نظامی را در مناطق مرزی میان بدخشان افغانستان و بدخشان مختار تاجیکستان راه‌اندازی کرده‌اند. هدف از راه‌اندازی این رزمایش جلوگیری از ورود تروریستان به خاک تاجیکستان خوانده می‌شود. این نمایش نظامی تاجیکستان در حالی در مرز با افغانستان اجرا می‌شود که اخیراً گزارش شده است که 37 تروریست تاجیکستانی در ولسوالی «نسی» ولایت بدخشان در خاک افغانستان مستقر شده‌اند.

بر اساس گزارش رسانه‎های تاجیکستان در پی افزایش ناامنی‌ها در ولسوالی نسی بدخشان، شورای امنیت ملی این کشور حدود سیزده روز پیش فیصله کرده است که با اجرای رزمایش نظامی در مناطق مرزی افغانستان و تاجیکستان توانایی نظامی این کشور باید به نمایش گذاشته شود تا نیروهای امنیتی و مردم در امر مبارزه با تروریسم و جلوگیری از نفوذ آنان در خاک تاجیکستان بسیج شوند.

این مانور نظامی در مرز با افغانستان دو روز پیش (دوشنبه، سیزدهم اسد) آغاز شده و امروز پایان خواهد یافت. در این رزمایش  نظامی، بیش از سه صد واسطۀ نقلیه زرهی، چرخ‌بال‌های نظامی و تجهیزات جنگی به نمایش گذاشته شده است. مدیریت این نمایش نظامی را وزیر دفاع و رییس ستاد ارتش تاجیکستان بر عهده دارند. گفته می‌شود که حدود ده هزار نظامی در این رزمایش سه روزه شرکت کرده‌اند.

این رزمایش نظامی تاجیکستان در حالی در مرز با افغانستان اجرا می‌شود که مقام‌های دولت تاجیکستان می‌گویند که 37 تن از افراد وابسته به گروه‌های تروریستی تاجیکستانی در ولسوالی نسی ولایت بدخشان در خاک افغانستان مستقر شده‌اند. مقام‌های محلی در ولایت بدخشان هفتۀ گذشته با تأیید این موضوع در گفت‌وگو با خبرگزاری نشانه از افزایش فعالیت‌های‌ گروه‌های تروریستی به ویژه گروه انصارالله تاجیکستان در این ولایت اظهار نگرانی کرده‌اند.

مسوولان محلی در ولایت بدخشان می‌گویند که فعالیت تروریستان خارجی از جمله افراد مربوط به گروه‌های تروریستی انصارالله تاجیکستان، جنبش اسلامی ترکستان شرقی، شبکۀ القاعده و داعش در این ولایت افزایش یافته است. اعضای شورای ولایتی و باشنده‌گان ولایت بدخشان نیز از احتمال تبدیل شدن بدخشان به مرکز تروریستان خارجی نگران هستند. آنان خواهان اقدامات جدی دولت در تأمین امنیت این ولایت هستند.

با این همه، مسوولان محلی در ولایت بدخشان می‌گویند که هر اقدامی که به منظور جلوگیری از فعالیت‌های تروریستی در مناطق مرزی صورت می‌گیرد برای حکومت محلی بدخشان ستودنی است. نیک محمد نظری، سخنگوی والی بدخشان می‌گوید که هر اقدام کشور تاجیکستان که برخلاف معاهدات مرزی نباشد برای حکومت محلی این ولایت مشکل‌ساز نیست. آقای نظری می‌افزاید که نیروهای نظامی تاجیکستان تا هنوز هیچ‌ گونه اقدامی برخلاف معاهدات مرزی انجام نداده‌اند و آنان تلاش دارند که با حفظ معاهدات مرزی افزون بر بهبود همکاری‌های مرزی مناسبت‌های میان دو کشور را تقویت کنند.

تاجیکستان مرز طولانی با بدخشان افغانستان دارد و افزایش فعالیت گروه‌های تروریستی در این ولایت به ویژه در مناطق مرزی از چند سال به این‌سو مایۀ نگرانی حکومت تاجیکستان شده است. مقام‌های امنیتی این کشور تلاش دارند تا راه‌کارهایی را به هدف جلوگیری از نفوذ تروریستانی که بخش بزرگ آنان را اتباع تاجیکستان تشکیل می‌دهند، به کشورشان جلوگیری کنند. این نمایش رزمی از همین رو در مرز با افغانستان به اجرا گذاشته شده است.