شرکت برق‌رسانی کشور (برشنا) اعلام کرده است که در مقدار برق وارداتی تاجیکستان به افغانستان ۳۱۰ میگاوات کاهش به میان آمده است. مسوولان این شرکت می‌گویند که تاجیکستان برق وارداتی افغانستان را حوالی ساعت 7:30 بامداد امروز از 350 میگاوات به 40 میگاوات کاهش داده است.

بر اساس معلومات شرکت برق‌رسانی کشور، این کار به دلیل کمبود آب صورت گرفته است. از همین‌رو، مسوولان برشنا می‌گویند که برق به گونۀ نوبت‌وار تنظیم می‌شود. شرکت برق‌رسانی تلاش دارد که کمبود برق را از منابع تولید داخلی تأمین کند. مسوولان این شرکت خاطرنشان می‌سازند که برای تأمین انرژی برق با جانب اوزبیکستان در حال گفت‌وگو هستند تا انرژی برق کابل و ولایت‌های دیگر کشور را تأمین کند.

گفتنی است که از برق وارداتی تاجیکستان ولایت‌های کابل، ننگرهار، لغمان، لوگر، پکیتا، خوست، پروان، پنجشیر، کاپیسا، بغلان و قسمتی از ولایت قندوز استفاده می‌کردند.