زلمی خلیل‌زاد، نمایندۀ ویژۀ امریکا در امور صلح افغانستان با رییس‌جمهور تاجیکستان دربارۀ صلح افغانستان گفت‌وگو کرده است.

سفارت امریکا در تاجیکستان اعلام کرده که این دیدار دیروز (سه‌شنبه، چهاردهم ثور) در شهر دوشنبه، پایتخت تاجیکستان صورت گرفته است. روند صلح افغانستان و تقویت اجماع منطقه‌یی برای موفقیت این روند محور بحث میان دو جانب در این دیدار عنوان می‌شود.

به نقل از خبرنامۀ سفارت امریکا، رییس‌جمهور تاجیکستان می‌گوید که دوشنبه از همۀ ظرفیتش برای حل مسألۀ افغانستان استفاده خواهد کرد.

همزمان با این، آقای خلیل‌زاد نیز نقش تاجیکستان را در موفقیت روند صلح افغانستان و اتصال منطقه‌یی برای انکشاف اقتصادی منطقه مهم توصیف می‌کند و از این کشور می‌خواهد که از ظرفیت‌های خود در روند صلح افغانستان کار بگیرد.

گفتنی است که زلمی خلیل‌زاد دو روز پیش، پس از دیدار با همتایان روس، چین و پاکستانی‌اش در دوحه، وارد کابل شد و با سران دولت و سیاسیون افغانستان دیدار کرد. خلیل‌زاد در جریان این سفر اعلام کرد که واشنگتن مخالف هر گونه تلاش طالبان برای کسب قدرت از راه نظامی در افغانستان خواهد بود.