امام علی رحمان، رییس‌جمهور تاجیکستان در دیدار با رییس شورای عالی مصالحۀ ملی کشور می‌گوید که برقراری صلح در افغانستان به تأمین ثبات در منطقه کمک خواهد کرد.

شورای عالی مصالحۀ ملی امروز (سه‌شنبه، دوم جدی) در خبرنامه‌یی آورده است که عبدالله عبدالله، رییس این شورا پیش از چاشت امروز با امام علی رحمان، رییس‌جمهور تاجیکستان در شهر دوشنبه دیدار کرده است. به نقل از خبرنامه، آقای رحمان در این دیدار از روند صلح افغانستان اعلام حمایت کرده است.

در خبرنامۀ شورای عالی مصالحۀ ملی آمده است که آقای رحمان در این دیدار می‌افزاید که افغانستان و تاجیکستان هر دو از افراط‌گرایی و تروریسم متأثر شده است. او بیان داشته است که تأمین صلح در افغانستان به برقراری ثبات و کاهش فعالیت گروه‌های تروریستی در منطقه کمک می‌کند.

رییس‌جمهور تاجیکستان همچنان برقراری ثبات در افغانستان را زمینه‌ساز گسترش روابط اقتصادی میان کشورهای منطقه به ویژه آسیای مرکزی و جنوب آسیا، می‌خواند. به گفتۀ او، تأمین صلح در افغانستان افزون بر ثبات منطقه‌یی، بر انکشاف کشورهای منطقه‌ نیز موثر واقع خواهد شد.

گفتنی است که عبدالله عبدالله، رییس شورای عالی مصالحۀ ملی کشور از آن چه جلب حمایت قدرت‌های منطقه از روند صلح خوانده می‌شود، روز گذشته به تاجیکستان سفر کرد. او پیش از این به کشورهای هند، پاکستان، ایران، ترکیه و اوزبیکستان نیز سفر کرده است.