ارگ ریاست جمهوری اعلام کرده است که محمد اشرف غنی، رییس‌جمهور کشور رهسپار شهر دوشنبه، پایتخت کشور تاجیکستان شده است.

ارگ بامداد امروز (دوشنبه، نهم حمل) در خبرنامه‌یی آورده است که آقای غنی به هدف اشتراک در نهمین نشست وزیران خارجۀ قلب آسیا – پروسۀ استانبول به تاجیکستان سفر کرده است. در خبرنامۀ ارگ آمده است که یک هیأت بلندرتبۀ دولتی رییس‌جمهور را در این سفر همراهی می‌کند.

بر اساس این خبرنامه، آقای غنی در نشست وزیران خارجۀ قلب آسیا سخنرانی خواهد کرد. افزون بر آن قرار است او با رییس‌جمهور و شماری از مقام‌های ارشد دولت تاجیکستان نیز دیدار کند.

بر اساس معلومات ارگ، این سفر رییس‌جمهور دو روز به درازا خواهد کشید.

گفتنی است که سلسله نشست‌های قلب آسیا – پروسۀ استانبول از مهم‌ترین ابتکار‌های مشترک منطقه‌یی افغانستان، ترکیه و آسیای مرکزی به شمار می‌رود. در این نشست‌ها روی اتصال منطقه‌یی و مبارزۀ مشترک با تهدید‌های منطقه‌یی بحث می‌شود.