امام علی رحمان، رییس‌جمهور تاجیکستان می‌گوید که خواست‌ها و منافع شهروندان افغانستان باید در روند جاری صلح این کشور در نظر گرفته شود.

آقای رحمان امروز (سه‌شنبه، دهم حمل) در مراسم گشایش نهمین نشست قلب آسیا – پروسۀ استانبول، جنگ جاری در افغانستان را زمینه‌ساز بی‌ثباتی در منطقه می‌خواند.

آقای رحمان می‌گوید که گروه‌های تروریستی و افراطی با استفاده از وضعیت پیچیده در افغانستان تلاش دارند منطقه را ناامن بسازند. او می‌افزاید که همۀ کشورهای منطقه باید برای موفقیت روند صلح افغانستان تلاش کنند.

رییس‌جمهور تاجیکستان ضمن اعلام حمایت همه‌جانبۀ کشورش از روند صلح افغانستان اظهار می‌دارد که خواسته‌ها و منافع همۀ شهروندان افغانستان باید در روند جاری صلح در نظر گرفته شود.

گفتنی است که تاجیکستان امروز از نهمین نشست قلب آسیا – پروسۀ استانبول در شهر دوشنبه، پایتخت این کشور میزبانی می‌کند. این روند مهم‌ترین ابتکار منطقه‌یی دولت افغانستان به شمار می‌رود که در همکاری با ترکیه روی دست گرفته شده است.

نهمین نشست روند استانبول که بیش از سیزده کشور منطقه‌یی در آن شرکت کرده‌اند به اتصال منطقه‌یی و روند صلح در افغانستان متمرکز است.