طاهر ذاکر‌زاده، رییس مجلس نمایندگان تاجیکستان می‌گوید، صلح در افغانستان زمینه‌ساز تامین ثبات در منطقه خواهد بود.

شورای عالی مصالحۀ ملی امروز(دوشنبه، اول جدی) در یک خبرنامه می‌گوید، آقای ذاکرزاده، این مطلب را در دیدار با عبدالله عبدالله، رییس شورای عالی مصالحۀ ملی افغانستان در شهر دوشنبه مطرح کرده است.

به نقل ازخبرنامه، آقای ذاکر زاده می‌گوید، تاجیکستان ضمن ادامۀ روابط دوستانه با افغانستان از پروسۀ  صلح این کشور حمایت می‌کند. به گفتۀ او دوشنبه از پروسۀ جاری صلح در افغانستان حمایت کرده و این پروسه را زمینه ساز ثبات در سطح منطقه می‌داند.

براساس خبرنامۀ  شورای عالی مصالحه، رییس مجلس تاجیکستان همچنان در این دیدار بر افزایش روابط بین پارلمان دو کشور تاکید کرده است.

گفتنی است که رییس شورای عالی مصالحۀ ملی، بامداد امروز به هدف تقویت اجماع منطقه‌‌یی پیرامون صلح کشور به تاجیکستان سفر کرد. رییس شورای عالی مصالحۀ ملی در این سفر به شمول رییس جمهور تاجیکستان قرار است با سایر مقام‌های این کشور نیز دیدار کند.

این ششمین سفر منطقه‌‌یی رییس شورای عالی مصالحۀ ملی است که به هدف تقویت اجماع منطقه‌یی، پیرامون صلح در کشور صورت می‌گیرد.