وزارت امور خارجۀ کشور اعلام کرده است که محمدحنیف اتمر، سرپرست این وزارت در رأس یک هیأت بلندپایۀ دولتی عازم شهر دوشنبه، پایتخت تاجیکستان شده است.

وزارت امور خارجۀ کشور بامداد امروز (پنج‌شنبه، 27 سنبله) با نشر خبرنامه‌یی می‌گوید که این سفر آقای اتمر به دعوت رسمی وزیر خارجۀ تاجیکستان صورت گرفته است. بر اساس این خبرنامه، قرار است آقای اتمر در جریان این سفر با امام علی رحمان رییس جمهور، قاهر رسول‌زاده صدراعظم، سراج‌الدین مهرالدین وزیر خارجه و سید مومن یتیم‌اوف رییس کمیتۀ دولتی امنیت ملی کشور تاجیکستان دیدار و گفت‌وگو کند.

تقویت روابط میان دو کشور در بخش‌های امنیتی، سرحدی، ترانسپورت، سرمایه‌گذاری، تجارت، ترانزیت و انرژی از آجندای مورد بحث سرپرست وزارت خارجۀ کشور با مقام‌های تاجیکستانی عنوان شده است.

خبرنامۀ وزارت امور خارجه همچنان می‌افزاید که شماری از مقام‌های دولتی، والیان و اعضای پارلمان نیز آقای اتمر را در این سفر همراهی می‌کنند. در خبرنامه اما هویت این مقام‌ها شرح داده نشده است.

سرپرست وزارت امور خارجۀ کشور در حالی به تاجیکستان دعوت شده است که مذاکرات مستقیم صلح میان طالبان و دولت افغانستان به تازه‌گی آغاز شده است. مقام‌های تاجیکستان از وضعیت پس از صلح و ناامنی در ولایت‌های شمال افغانستان به ویژه ولایت‌های هم‌مرز با این کشور نگران هستند.