صحبت تلیفونی غنی با رییس‌جمهور تاجیکستان
neshananews
11 February 2021ارگ ریاست جمهوری اعلام کرده است که محمد اشرف غنی، رییس‌جمهور کشور با امام علی رحمان، رییس‌جمهور تاجیکستان از طریق تلیفون صحبت کرده است.
ارگ با نشر خبرنامه‌یی می‌نویسد که این صحبت تلیفونی پیش از چاشت امروز (پنج‌شنبه، 23 دلو) صورت گرفته است. روند صلح افغانستان، اتصال منطقه‌یی و بهبود روابط میان دو کشور محور این گفت‌وگو عنوان می‌شود.
در خبرنامۀ ارگ آمده است که رییس‌جمهور تاجیکستان ضمن اعلام حمایت کشورش از روند صلح افغانستان از رییس‌جمهور غنی دعوت کرده است که به مناسبت بیستمین سال تأسیس سازمان همکاری‌های شانگهای به تاجیکستان سفر کند. از بیستمین سالگرد این سازمان قرار است در ماه حمل سال روان خورشیدی در شهر دوشنبه تجلیل شود.
تاجیکستان همسایۀ شمالی افغانستان است. این کشور در چوکات برنامۀ اتصال منطقه‌یی قرار است در آینده روابط گستردۀ اقتصادی با افغانستان داشته باشد. شماری از کارشناسان اقتصادی، تطبیق برنامۀ اتصال منطقه‌یی که از طریق توسعۀ زیربنای ترانزیت امکان‌پذیر است را مهم‌ترین تضمین ثبات در افغانستان عنوان می‌کنند.
