عبدالله عبدالله، رییس شورای عالی مصالحۀ ملی در رأس یک هیأت بلند رتبۀ دولتی کابل را به مقصد دوشنبه ترک کرد.

شورای عالی مصالحۀ ملی اعلام کرده است که آقای عبدالله بامداد امروز (دوشنبه، اول جدی) بر اساس دعوت رسمی دولت تاجیکستان عازم این کشور شده است.

بر اساس خبرنامۀ این شورا، آقای عبدالله در این سفر با امام علی رحمان رییس جمهور، قاهر رسول‌زاده نخست وزیر، محمد طاهر ذاکرزاده رییس مجلس نماینده‌گان و سراج‌الدین مهرالدین وزیر خارجۀ تاجیکستان در پیوند به روند صلح افغانستان گفت‌وگو خواهد کرد.

بر اساس این خبرنامه، تقویت اجماع منطقه‌یی پیرامون صلح افغانستان از مهم‌ترین اهداف این سفر رییس شورای عالی مصالحۀ ملی به تاجیکستان است.

گفتنی است که آقای عبدالله از این پیش به منظور تقویت اجماع منطقه‌یی پیرامون صلح به کشورهای هند، پاکستان، اوزبیکستان، ایران و ترکیه سفر کرده است.