نشست بین‌المللی مسکو در مورد صلح افغانستان با اشتراک نماینده‌گان دولت، طالبان، کشورهای منطقه، امریکا و چین لحظات پیش در روسیه آغاز شده است.

خبرگزاری اسپوتنیک روسیه پس از چاشت امروز (پنج‌شنبه، 28 حوت) با نشر تصاویری از آغاز نشست مسکو در مورد صلح افغانستان خبر می‌دهد. بر اساس معلومات این خبرگزاری، قرار است سرگی لاوروف، وزیر خارجۀ روسیه این نشست بین‌المللی را افتتاح کند و سپس سران هیأت‌های اعزامی دولت افغانستان و طالبان در آن سخنرانی کنند.

تسریع روند مذاکرات صلح، تقویت گفت‌وگوهای صلح میان هیأت‌های مذاکراتی دولت افغانستان و طالبان در دوحه و کاهش خشونت‌ها در کشور از آجندای این نشست عنوان شده است.

دوازده تن از چهره‌های سیاسی به شمول عبدالله عبدالله رییس شورای عالی مصالحۀ ملی، حامد کرزی رییس‌جمهور پیشین، مارشال دوستم و کریم خلیلی معاونان پیشین ریاست جمهوری از جانب دولت افغانستان در این نشست اشتراک کرده‌اند.

طالبان نیز یک هیأت ده نفری را به سرپرستی ملا عبدالغنی برادر، معاون سیاسی این گروه به نشست مسکو فرستاده‌اند. زلمی خلیل‌زاد، نمایندۀ ویژۀ امریکا در امور صلح افغانستان و نماینده‌گانی از ایران، پاکستان، چین و شماری از کشورهای دیگر منطقه نیز در این نشست حضور دارند.