وزارت خارجۀ کشور اعلام کرده است که نهمین نشست مشترک وزیران خارجۀ قلب آسیا – پروسۀ استانبول با میزبانی مشترک کابل و دوشنبه در تاجیکستان برگزار می‌شود. رییس‌جمهور غنی برای شرکت در این تشست رهسپار تاجیکستان شده است.

این وزارت امروز (دوشنبه، نهم حمل) در خبرنامه‌یی نوشته است که این نشست با اشتراک رییسان جمهور افغانستان و تاجیکستان و وزیران خارجۀ سیزده کشور آسیایی فردا (سه‌شنبه، دهم حمل) در شهر دوشنبه برگزار خواهد شد.

در خبرنامۀ این وزارت آمده است که تقویت اجماع منطقه‌یی پیرامون صلح افغانستان، گسترش همکاری‌های منطقه‌یی و اتصال منطقه‌یی در این نشست به بحث گرفته می‌شود.

نشست‌های سلسله‌وار قلب آسیا – پروسۀ استانبول که همه‌ساله برگزار می‌شود، مهم‌ترین ابتکار منطقه‌یی به شمار می‌رود که به گونۀ مشترک از سوی افغانستان و ترکیه روی دست گرفته شده است. مبارزۀ مشترک با تهدید‌های منطقه‌یی از جمله تروریسم و اتصال منطقه‌یی مهم‌ترین آجندای این روند است.

نهمین نشست قلب آسیا – پروسۀ استانبول فردا در دوشنبه در حالی قرار است برگزار شود که دولت افغانستان و گروه طالبان برای اشتراک در نشست انقره که برای آیندۀ کشور حیاتی گفته شده است، آماده‌گی می‌گیرند.