شورای عالی مصالحۀ ملی اعلام کرده است که هیأت بلندرتبۀ دولت افغانستان به رهبری عبدالله عبدالله، رییس این شورا در نشست مسکو اشتراک خواهد کرد.

فریدون خوزون، سخنگوی شورای عالی مصالحۀ ملی امروز (سه‌شنبه، 26 حوت) در برگۀ تویترش نوشته است که این هیأت فردا به مسکو خواهد رفت. آقای خوزون در مورد اعضای دیگر هیأت اعزامی دولت افغانستان به نشست مسکو جزییات ارایه نکرده است، اما خاطرنشان می‌سازد که رهبری این هیأت را عبدالله عبدالله، رییس شورای عالی مصالحۀ ملی بر عهده خواهد داشت.

در همین حال، منابع معتبر به خبرگزاری نشانه می‌گویند که محمد معصوم استانکزی، رییس هیأت مذاکره‌کنندۀ صلح دولت، متین بیک، نادر نادری و حبیبه سرابی اعضای این هیأت، حامد کرزی، جنرال عبدالرشید دوستم، گلبدین حکمتیار، میر رحمان رحمانی، محمد علم ایزدیار، سعادت نادری، محمد کریم خلیلی از چهره‌های سیاسی کشور نیز در این هیأت شامل‌اند. از سوی دیگر، عبدالله خنجانی و بابر فرهمند به عنوان کارشناسان تخنیکی در این نشست شرکت خواهند کرد.

این نشست به ابتکار دولت روسیه با اشتراک نماینده‌گانی از کشورهای منطقه، چین و امریکا تا دو روز دیگر در مسکو برگزار می‌شود. دفتر سیاسی طالبان در قطر نیز اعلام کرده است که یک هیأت ده نفری این گروه به سرپرستی ملا عبدالغنی برادر، معاون سیاسی این گروه در نشست مسکو اشتراک خواهد کرد.