وزارت امور خارجه کشور اعلام کرده است که تاجیکستان نسبت به گسترش همکاری‌های اطلاعاتی و امنیتی با افغانستان اعلام آماده‌گی کرده است.

وزارت امور خارجه با نشر خبرنامه‌یی می‌گوید که این موضوع عصر دیروز امروز (جمعه، 28 سنبله) در جریان دیدار محمد حنیف اتمر، سرپرست وزارت امور خارجۀ افغانستان با سید مومن یتیموف، رییس کمیتۀ امنیت ملی تاجیکستان در شهر دوشنبه مطرح شده است.

خبرنامه می‌افزاید که آقای اتمر در این دیدار آماده‌گی دولت افغانستان را برای تقویت  همکاری‌های اطلاعاتی و امنیتی با تاجیکستان اعلام کرده است. بر اساس این خبرنامه، رییس کمیتۀ امنیت ملی تاجیکستان نیز بر اهمیت ارتقای روابط امنیتی و اطلاعاتی بین دو کشور تأکید کرده وآماده‌گی کشورش را برای تقویت این همکاری‌ها، اعلام کرده است.

بنا بر معلومات وزارت امور خارجۀ کشور، دو جانب تعهد کرده‌اند که در زمینۀ تأمین صلح، مبارزه با تروریسم و مهار جرایم سازمان یافته در سطح محلی، ملی و منطقه‌یی بین دو کشور همکاری‌های منظم صورت خواهد گرفت.

تاجیکستان و افغانستان بیش از یک‌هزار و 300 کیلومتر مرز مشترک دارند و روابط بین دو کشور در جریان نزدیک به دو دهۀ گذشته روز به روز نزدیکتر شده است.