465464564

افزایش تحرک طالبان در مرزهای تاجیکستان؛ رییسان جمهور روسیه و تاجیکستان از طریق تلیفون صحبت کردند

neshananews

neshananews

06 July 2021

کاخ کریملین اعلام کرده که ولادی‌میر پوتین، رییس‌جمهور روسیه با امام‌علی ‌رحمان، رییس‌جمهور تاجیکستان از طریق تلیفون صحبت کرده است. کریملین با نشر خبرنامه‌یی می‌نویسد که این گفت‌وگوی تلیفونی پس از چاشت دیروز (دوشنبه، چهاردهم سرطان) صورت گرفته است.
بر اساس خبرنامۀ کاخ کریملین، وضعیت امنیتی در مرز میان افغانستان و تاجیکستان موضوع بحث رییسان‌جمهور روسیه و تاجیکستان بوده است.
در این خبرنامه آمده است که رییس‌جمهور روسیه برای هر نوع حمایت نظامی از تاجیکستان به هدف تأمین امنیت مرزهای جنوبی این کشور اعلام آماده‌گی کرده است.
این در حالی است که روز گذشته دولت تاجیکستان بیش از ۲۰ هزار سربازش را در مرزهای این کشور با افغانستان مستقر کرده است. این اقدام پس از آن روی دست گرفته شده که اخیراً چندین ولسوالی در ولایت‌های تخار، بدخشان و کندز به تصرف طالبان درآمده و صدها سرباز افغانستان نیز به خاک تاجیکستان متواری شده‌اند.