اولین پرواز

نخستین پرواز بین‌المللی به میدان هوایی خوست صورت گرفت

neshananews

21 June 2021

ادارۀ هوانوردی ملکی اعلام کرده که نخستین پرواز بین‌المللی به میدان هوایی خوست صورت گرفته است.

این اداره امروز (دوشنبه، 31 جوزا) در خبرنامه‌یی می‌نویسد که این پرواز توسط شرکت هوایی آریانا بین شهر دبی و ولایت خوست صورت گرفته است.

بر اساس معلومات ادارۀ هوانوردی ملکی، در نخستین پرواز بین‌المللی حدود 90 مسافر از شهر دبی به ولایت خوست سفر کرده‌اند. پس از این، پروازها میان دبی و خوست به گونۀ دوامدار صورت خواهد گرفت.

میدان هوایی بین‌المللی خوست در بیش از ده هزار جریب زمین توسعه داده شده و یکی از بزرگ‌ترین فرودگاه‌های بین‌المللی در جنوب کشور شناخته می‌شود. نخستین پرواز داخلی به این میدان هوایی دو سال پیش صورت گرفته است.