محمد اشرف غنی، رییس‌جمهور کشور پس از ورود به شهر دوشنبه با امام علی‌ رحمان، رییس‌جمهور تاجیکستان دیدار کرده است.

این دیدار پیش از چاشت امروز (دوشنبه، نهم حمل) در کاخ ملت تاجیکستان در شهر دوشنبه، پایتخت این کشور صورت گرفته است.

جزییاتی از موضوع‌های مورد بحث میان رییسان جمهور دو کشور تاکنون به گونۀ رسمی ارایه نشده است، اما گفته می‌شود که تقویت اجماع منطقه‌یی پیرامون صلح افغانستان و گسترش همکاری‌های منطقه‌یی از آجندای این دیدار می‌باشد.

این دیدار در حالی صورت گرفته است که تاجیکستان فردا میزبان نهمین نشست وزیران خارجۀ قلب آسیا – پروسۀ استانبول خواهد بود.

وزارت خارجۀ کشور برگزاری این نشست را در تقویت اجماع منطقه‌یی برای موفقیت روند صلح در کشور مهم توصیف کرده است. افزون بر رییسان جمهور افغانستان و تاجیکستان، وزیران خارجۀ سیزده کشور دیگری نیز در این نشست اشتراک خواهند کرد.