هند، پاكستان و مدني اعتراض لرگه قرشي قوزغلان تهمتي
neshananews
22 February 2020منبع: الجزيره عمر علي جان
ترجمه: نشانه
كورينيشي دن هند يريم قطعه سي سياسي مخاف لرني ينچيش اوچون ينگي باسقيچ تمان يول آلگن. بو قطعه ده استعمار دوري ديك سياسي مخاف لرگه قوزغالانچيليك تهمتي ني تاقيش و مخالف لر آوازيني اوچيريش بهانه سي ، هند و پاكستان حكومتلري قوليده ييريك بير قورال گه ايلنگن.
٢٠١٩ ييلي دسمبر آيي ده پاكستان حكومتي يوزلرچه اعتراچي لرني قوزغلانچيليك گه عيبلشدي، بو اعتراضچي لر بير عمومي حركت اعضالري ايديلر كه باشقه بير قطار طلب لردن علاوه طلبه لر اويشمه سي ايجاد ايتيلشي ني هم ايسترديلر.
اشبو اعتراضلي نمايش اشتراكچيلريدن بيري عالمگير وزير دسمبر آيي ايككنچي سيده توتقين ده آليندي و حاضرگه چه ” حكومت ني تونتريش توطيه” سي عيبلوي بيلن تورمه ده سخلنماقده.
جاري ميلادي ييل ٢٧ نچي جنوري كونيده پشتون لردن حفاظت ايتيش حركتي رهبري منظورپشتين پشاورشهريده گي اوي دن قوزغلانچيليك عيبلوي بيلن توتقين ده آليندي، بير كون اوتگچ پوليس باشقه ٢٣ كيشي ني جمله دن خلق ايشچيلر حزبي اعضالريني منظور پشتين توتقين ده آلينگني گه اعتراض بيلدريش عيبلوي بيلن اسلام اباد شهريده تورمه گه سالدي.
“تحفظ پشتون” حركتي پاكستان ده پشتون لر حق حقوقي دن مدافعه ايتيش مقصدي بيلن تشكيل قيلينگن، بو حركت، پاكستان ليك طالبان گه قرشي كورش آتي بيلن پاكستان اردو و امنيتي قوتلري تمانيدن پشتون لر حقوقي اياغ آستي بولگني بويچه شفافيت يوزگه چيقيشي اوچون كورشيب كيلگن. بوحركت ايجاد بولگني ايلك كونلريدن بيري پاكستان حكومتي نينگ تورلي خيل تهديد و هجوملري بيلن يوزمه يوز بولگن.
هرچند پاكستان نينگ خلق ايچيلر حزبي و پشتون لر حقوقي دن محافظت قيلوچي حركت اعضالري توتقين دن قويب يوباريلگن اما هلي هم بو فعال لردن بيرقنچه سي خصوصا منظور پشتين تورمه گه سخلنماقده. توتقين ده آلينگن بو شخص لر حكومت تمانيدن كورستيلگن قوپال مناسبت لردن تنقيد قيلگن ليك لري سبب احتمال ييل لرچه تورمه لرگه سخلنيش لري ممكن.
بو واقعه لر درحقيقت حكومت اقتداري ني خطرگه ساله ياتگان و بوزغونچيليك گه قرشي قانون دن پاكستان حكومتي ناتوغري قوللنيشي دن درك بيره دي.
پاكستان قوشني ليگيده جايلشكن هندوستان ده هم بوزغونچيليك و قوزغالانچيليك گه قرشي قانون، ٢٠١٦ نچي ييل ده بير ناراضليك نمايش جريانيده، هندوستان حكومتي گه قرشي جواهر لعل نهرو عالي اقويورتي طلبه لري تمانيدن بيريلگن شعارلر اوچون طلبه لر حركتي رهبرلري كنايها كمار و خالدعمر لرگه قرشي فايده لنيشي توغري كيله دي.
” جي ان يو” عالي اوقويورتي سون قوليك فكرگه ايگه عالي درگاه تانيلگن و هندوستان حاكميت ده بولگن ناسيوناليست حزب، بو حركت لرني بوحزب نينگ قدرت طلب ليك تويغولريگه قرشي خلل يتكزوچي ايكن گه ايشانچلي بوليب شو سبب دن بو عالي درگاه طلبه لريني ناقانوني روشده دايم قيناق و عذاب بيريب كيلماقده.
شو جاري آي باشيده جي ان يو عالي اوقويورتي نينگ بير تحقيقاتچي سي شارجيل امام، حاضرهم هندوستان ده دوام ايته ياتگان وطنداشليك قانوني گه قرشي يولگه قويلگن ناراضليك نمايش گه اشتراك ايتكني سبب قوزغالانچيليك گه عيبلندي.
آخرگي ييل لرده قوزغالانچيليك گه قرشي قانون، سوداگرلر، اطراف محيط فعال لري و عالي اوقويورت لر استادلري اويشمه لريگه قرشي بوتون هندوستان بويلب اجرا ايتيلدي.
بو واقعه لرگه نسبتن دقت گه سزاوار بحث بو اساس سيز تهمت لر انه شو قانون اساسيده بو فعال لرگه نسبتن عملي بوليب استعمارگه قرشي بولگن حركت و اويشمه لرني تزيق و چيكلولر آستيده آليب كيلماقده.
هندوستانده استعمار دوري و گاندي يوزگه كيلگني دن آلدين ناسيوناليست لر رهبرلريدن بيري بال گانگادهرتيلك، نيچه مراتبه قوزغالانچيليك گه قرشي استعماري قانون گه اساسا قول يازمه لري آرقلي اهالي ني تورتكي بيرگني عيبلوي بيلن تعقيب آستيده آلينگندي. ١٩١٦ ييل ده اوني محكمه سي جريانيده بير ياش مدافعه وكيل محمدعلي جناح اوندن مدافعه ايتي.جناح سونگي ييل لرده هندوستان بولينيشي و تجزيه سي اصلي عاملي بوليب و پاكستان دولتي اساسچي حساب لنه دي.
١٩٢٠ ييل دن ١٩٤٠ ييل گه چه كوپ لب هندوستانليك لر جمله دن مهاتماگاندي، مولانا محمدعلي جوهر، بگن سنگ و ام ان راي محكمه بولدي لر. اما مستقليك دن سونگ بريتانياليك هندي مسول لر بو قانون دن محلي اهالي گه قرشي ” بيگانه لرجاسوسي” عنواني ايله اوز اولكه لريده فايدلنيب كيلديلر.
بوتون شبه قاره ده مستقلليك كورش فعال لري بوزغونجيليك و قوزغالانچليك عيبلوي بيلن توتقين ده اليب تورمه لرده سخلنرديلر.. اولر قوزغالانچي لقبي ني فخر بيلن تن الرديلر. اولر اهالي تمانيدن چمپيانلر و قهرمانلر صفتي القيشلنرديلر، نيگه كه سونگي ييل لرده وطنسيورلر، حاكم قدرت و سيستم گه قرشي فعال لر اوله راق تانيلرديلر.
مستقل دولت لر يوزه كه كيلگن بيرينچي ييل لردن سونگ پاكستان و هندوستان خلق لري ابسكي استعماردن ميراث قالگن پارادوكس بيلن يوزمه يوز ايديلر. بيرتماندن ملي حاكميت گه اساسا استعماري سياست لر و باشقه تماندن استعماري دولت تيزيمني سخلش اوچون اساسي دقت مردم ني تهديد قيليش و قورقتيش اصول لريگه اساسلنگندي.بو پارادوكس صدمه لري يعني مخالفان لرني تهديد قيليش بيلن ملي حاكميت ني سخلش حاضرگه قدر بو ايككي مملكت اهالي لري قرشي سيده تورگن موضوع دير.
قوزغالانچيليك گه قرشي قانون بو استعماري منطق ني انگلته دي كه حكومت، مردم گه خذمت كورستوچي ارگان ايمس بلكه مردم ني قورقتيش و تهديد قيليش ارگان اوله راق نظر ده آلينگن.
اخرگي سركوبلرني اينگ مهم خصوصيتي ” قوزغالانچليك سوزلرني” تاكيد قيلينيشي دير.بوكون لر هندوستان و پاكستان ده سيز حكومت لرگه قرشي دسيسه لرگه دخلدار ايكن ليگيز لازم ايمس بلكه يالغيز سيزنينگ بوحكومتلرگه قرشي سوز و شعارلرينگيز دولت و ملت گه قرشي ريجه لنگن دسيسه اوله راق تفسير و معنا بوله دي.
حكومت لر قوزغالانچيليك گه قرشي قانون دن سيزني سوز و انديشه لريزگه چيكلوايجاد ايتيب نظارت اختياريدن قوللنه آله دي و بو طريقه دن اوزلري نينگ تفرقه طلبليك، كم سيتيشليك وتنقيدلردن قوتقريب، قورقو ايجاد ايتيش يوليدن حاكميت و قدرتي ني اشكارا ايته دي.
بو حكومت لرني ناتينچليك حس قيليش لريني ايلديزي، اهالي احتياجليك لريني تامين لي آلمسليك و مسوليت لريني بجره آلمسليك اوچون كفايه سيز و كوچسيز ايكن ليك لريدن دلالت بيره دي.
پاكستان ده عمران خان رهبرليگيده بولگن حكومت اينگ بير ظالمانه شرطنامه ني جهان بانكي بيلن امضالشدي، البته اوني نتيجه سي مملكت ده حاضر كورينيب توركن يمان اقتصادي وضعيت دير. پاكستان ده تعليم وتربيه بودجه سي ٤٠ فايز كميدي و ساغليك ني سخلش تيزيمي بوتكل خصوصي سكتورگه تاپشيريلدي. عيني حالده بوغداي كمچيليگي، آذوق اوقات ماركيتي گه سل بي تاثير قالديريب و انفلاسيون بو مملكت ده ١٤ فايزگه كوتاريلدي.
هندوستان ده اقتصاد ترقياتي پس گه توشيب بارماقده، اقتصاد ترقياتي نرخي هرييل ده ٨.١ فايزدن ٢٠١٨ نچي ييلي بيرينچي تورت آييده ٤.٥ فايزگه توشدي، ايشسيزليك كوپيشي و دهقانچيليك بوليميده تاپيلگن بحران، اهالي ني ييمليك اشياكه بولگن ضرورت لريني تامين لشدن عاجز قالدي. هندوستان اقتصاديني حقيقي احوالي، باش وزير نريندرا مودي نينگ ” يخشي كون لر” ديب اهالي گه بيرگن بشارت و وعده لريني سوال آستيده قالديرگن.
بو حاكم لر ايككي مملكت نينگ كون اوتيشي بيلن آرتيب باره ياتگان اقتصادي قيينتچيليك ومعمالري لريدن اهالي ذهني ني ادشتيريش اوچون حكومت و مردم لريگه قرشي بيرقطار فرضي دشمنلرني ايجاد قيليش ده اورينماقده لر.
شو فرضي دشمن نظريه سيگه مطابق پاكستان ده اعتراضچي سياستچي لردن كتته قسمي ” هندوستان جاسوسي” عيبلوي بيلن يوزمه يوز بولگنلر و شونينك ديك هندوستان ايسه حاضرگي حكومت مخالف لريني” آي اس آي ” جاسوسي ديب عيبلب كيلماقده و ايككي مملكت نينگ سياسي مخالف لري انه شو تهمت لر بيلن ينچيليب اوازلري اوچيريله دي. بونگه قره مسدن هلي هم منطقه ده بو سياست لرگه قرشي كورش و استقامت كوپيب بارماقده.
بو كورش و مخالفت لر ياش قتلمي تمانيدن رهبرليك بولماقده، بو قتلم، وطنداشلري اساسي حق حقوق لري تامين لنيشي گه توسيق بوليب تورگن سياستچي لر و حكومت باشليغ لري تمانيدن يولگه قويله ياتگان قومي ومذهبي كيلشموچيليك لر و قورقو توغديريش سياست لريدن بيزار بولگن لر، بو حركتلر رهبريتي بو منطقه اهالي سيني ايش و سوز ايركين ليگي كبي اساسي حق حقوق لري تامين لنيشي ايستشماقده لر.
مثال اوله راق مينگلب چه طلبه لر هندوستان ده تبعيضلي بولگن وطنداشليك قانوني گه قرشي كتته كان ناراضليك اعتراض لرني يولگه قويب باش وزير مودي حكومتي گه قرشي بيرييريك سياسي معما توغديرديلر.
شونينگ ديك پاكستانده عالي اوقويورت طلبه لري و تحفظ پشتون ناملي حركت اعضالري، ينگي حركت اوله راق باش كوتاريب پاكستان سياستچي لري ناكامليگي ني اشكارا قيليب و بيرسياسي و اقتصادي ايشبلرمان تيزيم يوزه گه كيليشي اوچون مردم ني بيرلشتيرماقده لر.
بو حركتلرني مهم خصوصيت لريدن بيري شو كه بو حركت لر اوز مشروعيت لريني اساسي قانون دن آله ديلر، هندوستان ده گي اعتراضچي لر ينگي تصديق لنگن وطنداشليك قانوني ني، هندوستان اساسي قانوني گه قرشي ديب ادعا قيله ديلر و بو قانون هندوستان ني قومي و مذهبي زوروانليك لر تمان آليب باريشي ممكن ديب ادعا قيلماقده لر.پاكستان ده ينگي حركت لر فعال لري ايسه، مملكت اساسي قانوني ده قيد ايتيلگن سوز ايركين ليگي و صنفي اويشمه لر ايجاد ايتيليشي حقي رعايه ايتيليشي ني ايستب بو قدريتلردن مدافعه ايته ديلر.
بو ايككي مملكت ده حكومت لر بو حركت لرني خيانت گه عيبلب و ناراضليك نمايش اشتراكچي لريني قوزغالانچيلر ديب بيليشه دي.
بو ايككي موضوع بويچه حكومت لر بو اعتراض لرگه قرشي قانون گه ضدبولگن مناسبت لري بيلن اسيا جنوبي ده حكومتدارليك سيستمي ني مشروعيت بحراني گه دچار قيلگن لر.
اما هندوستان و پاكستان نينگ سياسي فعال لري ايسه قوزغالانچيليك قانوني دن حكومت لر سو استفاده قيليشي گه نسبتن قرشي ليك اوازلريني يوكسلتيريب اعتراض لريني دوام ايتيرماقده لر.
بونداي بير شرايط ده اينگ اساسي سوال شو كه نمه اوچون قوزغلانچي ليك تهمت و عبيلولري تاقيلكن بوگروه لر نمه اوچون و نمه سبب چرچه ميدن اعتراض لريني دوام ايتيرماقده لر؟
بو سوال ني جوابي گه قول تاپيش شبهه سيز آسيا جنوبيده ايسكي استعماردن قالگن ناقولي ميراث ني يوق قيليش ده كتته ياردم يتكزيشي ممكن. عيني دمده بو سوال جوابي، مدني مخالف لر ناسيوناليزم تمانيدن سركوب بوله ياتگان منطقه ده حقيقي وطنسيورليك معنا سي ني يقال آشكار ايته دي.
