IMG-20200107-WA0010-880x550

شبرغان ده سینما وتیاتر بیشینچی فیستوالی اوتکزیلدی

neshananews

neshananews

14 January 2020

شبرغان شهریده بیرقطار مدنی انجمن لرتمانیدن، مدنیت وخبراداره  سی همکارلیگی بیلن سینما وتیاتر بیشینچی  فیستیوالی اوندای بیرحال ده یولگه قویلدی که بوولایت نینگ یگانه سینماسی طالبان حاکمیتی دوریده سنگسار بولیب ویران ایتلگندی.

جوزجان مرکزی شبرغان شهریده هرییلی محلی سینماچی و تیاتر فعاللری، مدنی انجمن لر و ولایت مدنیت وخبراداره سی همکارلیگی بیلن قیسغه فیلم لر و تیاترصحنه لری بیریمینی تورلی دولتی سالن لرده کوپ قینلیب یولگه قویه‌دیلر.

جوزجان ولایتی مدنیت وخبراداره سی نینگ سیاحت چلیک ومدنیت بولیمی مسولی کرامت الله عزیزی نشانه خبرآژانسی بیلن صحبت ده، بو فیستوال ده بیش قیسغه فیلم و ایککی تیاتر صحنه سی نمایش ایتیریلگنی دن خبر بیریب بو فیلم و تیاترنمایش لری جوزجانلیک یاشلرنینگ جاری ییل ده‌گی یوتوق لری بولگنی وصحنه گه چییققن فیلم وتیاتر موضوعلری افراطیت، تینچلیک، خوفسیزلیک قوت لر و هنر وصنعت گه نسبتن دقت سیزلیک دن عبارت بولگن دیب ایتی.

بوندن قریب ۵۰ ییل آلدین شبرغان شهریده ایککی قبتلی بیرسینما قوریلگندی. بونگه قوشیمچه آقچه اولسواللیگی ده هم بیر سینما بنا سی موجود ایدی اما شبرغان ده‌گی سینما طالبان قولیده ویران بولدی و آقچه ده‌گی بنا ایسه حاضرسبزوات ساتیش مرکزیگه ایلنگن.

۴۰دن کوپراق تیاترصحنه لریده رول اوینه‌گن فرشته نورانی نشانه خبرآژانسی گه سینما وتیاتر ساحه سیده عیال لر آزحصه قوشیشی و شبرغان ده تیاتر وسینما سالنی ضرورتی گه سوزلب، جوزجان ده سینما و تیاتر بویچه فعالیت لردن عیالراونچه لیک آگاه ایمسلیک لری اوچون اونچه لیک قیزیق میدیلردیدی. اوعینی دمده بوساحه ده یترلیچه تبلیغات بولمگنی اوچون عایله لرهم اوز قیزلرینی بو ساحه ده فعالیت قلیش ده رخصت بیرمیدیلر دیب ایتی.

فرشته نورانی تیاترصحنه لری اوچون مشق سالنی بولمگنی و نمایش اوچون مخصوص جای یوق لیگینی جوزجان سینماچی وتیاترفعاللری نینگ اساسی معما سی دیردیدی. او شونینگ دیک بو معمانی برطرف ایتیش اوچون اوتکن ایگرمه ییل جریانیده هیچقندای اعتبار قرتیلمگنی دن هم تنقیدلشدی.

طالبان گروهی حاکمیتی پیتیده، بو گروه قوراللی لری بیرینچی دن جوزجان ولایتی نینگ یگانه سینما سی شیشه لرینی تاش بیلن سیندیریب کین بناسینی هم ویران ایتیلر، لیکن شبرغان یشوچیلری سینما فعال بولگن ییللرده یخشی و خوش خاطره لریدن حکایت ایته‌دیلر.

یاشی ۵۰ ییل دن کوپراق بولگن خبرنگار محمدعالم رحمانیار، شبرغان ده سینما فعال بولگن ییللردن قیزیق خاطره سی بارلیگی نی ایتی:” ۵۰ نچی ییللرده جوزجان ده عیال وایرکک عموما سینماگه باریدیلر، سینما بناسیده ملی و خلق ارا مناسبت لراوچون بیرقطار احتفال لر اوتکزیلیشی دن علاوه، سینماده نمایش ایتیریله‌یاتگان فیلم لرنی تماشا قلیش ، شبرغان یشوچی لرینینگ مدنیتی جمله سیدن ایدی.عیال وایرکک تشویش سیزیان مه یان اولتیریب و کونده لیک خسته‌لیک لرنی برطرف ایتیش اوچون فیلم لرنی تماشا قیلدیلر”.

سیماسیدن ایسکی خاطره لرحسرتی یخشی کورنیب تورگن عالم رحمانیار جناب سوزلرینی دوام ایتیررایکن: ” ابم جوزجان سینماسیده تخنیکی آپاراتور ایدی، هروقت ینگی فیلم کیلگنیده ده بیزگه خبر بیرردی و بیزهم باریب فیلم لرنی تماشا قیلردیک.شونینگ دیک ایریم وقت لر بوسینماده ایران لیک و تاجیکستان لیک فیلم لرنی هم لذت بیلن تماشا قلیردیک”.

جوزجان ولایتی هنر وصنعت ساحه سیده یخشی قابلیت لرگه ایگه دیر؛ اما بوولایت صنعتچی لری تیارله‌گن فیلم لرنی نمایش گه قویش اوچون سینما سالنی بولمگنی دن شکایت قیلماقده لر. بو توغریده انیمیشین متخصصی محمد رفیع امیدسیزلیک بیلن اوز فکرینی بوندای بیان ایتی:” بیز اون ییل آلدین انیمیشن فیلم لرنی تیارلش بیلن بیرینچی بولیب افغانستان ده سینما ساحه یده ییریک اوزگریش کیلتیردیک؛ اما بوصنعت دن هیچ کیم حمایت قیلمه‌دی و سینما محصولاتی نی نمایش ایتیریش اوچون مناسب جای ومحل بولمگنی سبب ایشی میز رونق دن قالدی”.

جوزجان ولایتی مدنیت وخبراداره سی مدنیت وسیاحت چلیک بولیمی مسولی کرامت الله عزیزی سینما وتیاتر سالنی قوریلشی حقیده بوندای فکر بیلدیردی:” حیقیقتن هم بو توغریده هیچقندای بها بیریلمی و اعتبار قرتیلمگن، بیزایسه یقین کونلرده جوزجان عامه کتب‌خانه بناسی تمل تاشینی قویدیک و شونینگ دیک سینما وتیاتر سالنی بناسینی قورییش ایشینی یقین کیله‌جکده باشلی میز”.

شبرغان شهریده اوته آز امکانیت بیلن اوتکزیلگن سینما و تیاتر بیشینچی فیستوالی مراسمی ده جوزجان ولایتی مدنیت وخبراداره سی ریسی دن باشقه هیچ بیر دولتی مسولی اشتراک ایتمگندیلر.