IMG-20200311-WA0004-880x550

شبرغان ده عياللرگه تيگيشلي اوچنچي سپورت كلپي آچيلدي

neshananews

neshananews

11 March 2020

جوزجان ولايتي مركزي شبرغان شهريده عياللرگه تيگيشلي بولگن اوچنچي “فيتنس” مركزي جوزجان ولايتي عياللر اداره سي مسوللري و بيرقطار مدني فعاللر اشتراكي بيلن آچيليب ايش باشلدي.

بو سپورت مركزي مسولي مريم حداد ديدي:” شبرغان ده عياللر اوچون سپورت مركزي گه احتياج كوپ ايدي و شو احتياج گه اساسا بيز بو فيتنس مركزي ني آچيشده قرار آلديك”.
بو فيتنس مركزي ني آچيليشي ده آلتي يوزمينگ افغاني سرمايه ياتقيزيلگن و ايككي عيال مربي هم بو كلپ ده ايشليدي.

حداد خانم علاوه ايتي:” سپورت انسان لر ساغليگي ضامني دير و عياللر هم ايركك لر ديك ساغليك لريني سخلش و اولكه ده فعال راق رول اوينش اوچون سپورت قيليش لري كيرك”.
بوندن آلدين شبرغان شهريده عياللر اوچون ايككي سپورت كلپي ايجاد بولگندي.

رخسار بو كلپ آچيليش مراسميده اشتراك ايتكن قيزلردن بيري دير. او ديدي:” سپورت عيال و ايركك ني تانمي دي، عياللر و قيزلر ساغليك لريني سخلنيشي اوچون سپورتگه يوزكيلتيريش لري لازم. عيني دمده عايله لر قيز و عياللريگه سپورت قليش ده رخصت ببريش لري كيرك دير”.

بو سپورت كلپي ايش باشلش مراسيميده ٣٢ عيال فيتنس سپورتي ني باشلش ده قيزيقيش لريني كورستيب اسملريني رويخط ده كيرتديلر.

شبرغان شهريده ايركك لر اوچون اونلبچه فيتنس و باشقه رشته لرده مركز و كلپ لر فعاليت قيلماقده و انده سنده بو كلپ لر ارا تورلي رشته لرده بيله شولر هم يولگه قويله دي.