آلمان‌نینگ افعانستان و پاکستان ایشلری بویچه مخصوص نماینده‌سي مارکز‌ پوتزل افعانستان جمهوررييسی محمداشرف‌غني و ملي یرشیش عالی کینگاشی رییسی عبدالله عبدالله بیلن اوچرشیب ملاقات قیلگن.
جمهوررييس‌لیک سرايي بوکون( دوشنبه ۲۴ جوزا ) نشرایتکن خبرنامه‌سیده آلمان‌نینگ مخصوص نماینده‌سي بوکون توشدن آلدین ارگ ده جمهوررييس غني بیلن اوچرشکنی‌دن خبر بیرگن.
خبرنامه‌‌گه کوره افعانستان‌ و آلمان ارا ایککی تمان‌له‌مه علاقه‌لر و افعانستان تینچلیک آقیمی دن جهان جماعه‌سي حمایتلری بو اوچرشوده کوریب چیقلگنی تاکیدلنگن‌.
باشقه تماندن ملي یرشیش عالی کینگاشی هم نشر ایتکن خبرنامه‌سیده مارکزپوتزل جنابلری عبدالله عبدالله بیلن اوچرشیب ملاقات قیلگنی دن خبربیرگن.
بو کینگاش خبرنامه‌سیده افعانستان تینچلیک آقیمی و جهان‌جماعه‌سي و خصوصن آلمان‌نینگ بو آقیم‌دن حمایتی ایککی تمان ارا بحث موضوع‌سي بولگنی تاکیدلنگن.
آلمان‌نینگ افعانستان و پاکستان ایشلری بویچه مخصوص نماینده‌سي اوندای بیرحالده جمهوررييس و ملي یرشیش عالی کینگاشی ریسی بیلن اوچرشیب ملاقات قیلگن که سونگی وقتلرده افعانستان و پاکستان ارا علاقه‌لر ترنگلشکن.
جمهوررييس‌غنی‌ني ملي امنیت مصلحتچی‌سي حمدالله‌محب، پاکستان‌ني افعانستان توپراقی ایچکریسیده آلغه سیلجیش‌ده عیبلشکن.اما پاکستان تشقی‌ایشلر‌وزیری شاه‌محمود‌قریشی، محب‌جنابلری نینگ بو اظهاراتی‌ني قاره‌لب و رسمی علاقه‌سینی محب‌جنابلری دفتری بیلن کیسیب قویشکن‌.