صادق اوغل

امنيتي تهديدلرگه قرشي عيال ژورناليستلر مقاومتي

neshananews

neshananews

08 May 2021

جاري ميلادي ييل باشلنيشي دن بويان افغانستان ده عيال ژورناليست لر رسانه فعاللريگه قرشي مثلي كورينمگن امنيتي تهديدلر كوپيب بارماقده.اين وضعيت اونداي حالده يوزه گه چيققن كه صلح مذاكره لري خصوصن افغانستان حكومتي و طالبان ارا عياللر حقلري و ندني قدريتلري بويچه بحثلر رمضان هيتي دن سونگ بوليب اوتيشي نظرده توتيلگن. باشقه تماندن عياللر حقلريدن حمايه ايتوچي فعاللر تورلي يغين لر و رسانه اي بحث آرقلي عياللرني اوتكن ايگرمه ييل مدتيده حاصل بولگن حقلر و يوتوقلر سقلنيشي ده تاكيدلشكنر.
عيني حالده افغانستان دولتي و طالبان ارا صلح مذاكره لري باشلنگني دن سونگ، مملكت بويلب رسانه فعالللري بولگن عياللرگه قرشي هجوم و زوروانليكلر مثلي كورينمگن درجه ده كوپيگن. بوندن ايككي آي آلدين ننگرهار ولايتي ده بير خصوصي تلويزيون نينگ اوچ عيال ملازمي تانيلمكن قوراللي لر تمانيدن آتيب اولديريلدي و اوندن آلدين راق هم شو خصوصي تلويزيون نينگ عيال نطاقي ملالي ميوند هم تانيلمگن قوراللي شخصلر تمانيدن ترور بولگندي.
دولت بو حادثه لر عامللري طالبان ايكني ني ادعاقيلگن اما طالبان رسمي طرزده بو ترورلرگه دخلدار ايكني ني رد ايتكن.شو ترورلر سبب ننگرهار ولايتي ده كوپ عياللر رسانه اي فعاليت لردن قول تارتيب خانه نشين بولديلر. افغانستان ده عياللرگه برشي زوروانليكلر كوپيگني، رسانه لرده خذمت قيله يلتكان عياللرني خواتيرگه سالگن، اما دو وضعيت گه قرشي عيال فعاللرني كورش و قرشيليگي دوام ايتماقده.
جوزجان ولايتي مركزي شبرغان شهريده فعاليت قيله ياتكان غزل راديو – تلويزيوني بير عيال تمانيدن باشقريلماقده. بر خصوصي رسانه ده سكيز عيال و توقيز ايركك ايشلي ديلر.


بو خصوصي رسانه ايگه سي و باش مسوولي نيلا صادق اوغلو عيال فعاللرگه قرشي سونگي وقتلرده هجوم و زوروانليك لر كوپيگني بويچه نشانه خبر آژانسي بيلن صحبت ده ديدي: ” اكثر ولايتلرده رسانه فعاللري تروري تورلي ساحه لرده فعاليت قيله ياتكان عياللر ايشلريگه سلبي تاثير قالديرگن.”
او علاوه ايتي :” مين بير عيال اوله راق رسانه لرده خذمت قيله ياتكان عيال فعاللر ترور بولگني خبريني ايشيتگنيم ديك معلوم كه تشويشم كوپه يدي، اما بو تهديدلرگه قرشي مقاومت قيليش ده ناچار من؛ چونكه اگر بيز قورقيب ايشي ميزني ترك ايتسك باشقه عياللر هم ايشلش دن قول تارتيشه ديلر.”
خانم صادق اوغلو بير خصوصي رسانه باش مسولي اوله راق ديدي:” مين بو رسانه ني ايجاد قيلگنيم وقتيده رسانه فعاللري تهديد بوليشي يا تروري اوچون پلان در ايجاد بوليشي موضوع سي ني انابت گه آلگنديم.” او تا كه تريك من بو توغريده كورش و مجادله دن قول تارتمي من ديب تاكيد لشدي.
خانم صادق اوغلو اوتكن ١٨ ييل جريانيده افغان عياللر اوز حق و حقوقلريني بولگه كيريتيش اوچون كوپ قربانليك بيرگنلر ديدي. اونگه كوره حاضرچه عياللر تورلي ساحه لرده حتي وزير ورمعين لر سطحيده فعاليت قيلماقده لر. او بونگه قره مسدن عياللر مملكت كيله جگي و تقديريدن خواتيرگه ايكنليگي ني اورته گه قويب اما قولگه كيريتكت يوتوقلريني سقلش اوچون سعي و حركت و كورش دن قول تارتميديلر ديب تاكيدلشدي. خانم صادق اوغلو دولت و طالبان دن صاح مذاكره لري جريانيده عياللر حق حقوقلريني نظر گه توتيب اوني اوستيگه معامله قيلمسليك لريني طلب ايتكن.
غزل راديو -تلويزيوني ملازم لريدن بيري ٢٠ ياشلي خالده، جوزجان عالي اولو يورتيده تحصيل قيليشي بيلن عيني دمده غزل تلويزيونيده آشپزليك دستوريني نشرگه تيارليدي. خالده ديدي:” مين رسانه ده ايشلش ني سيورديم و هر بير ايش ده عيال و ايركك لر اورته سيده گي فرق كوتاريليشي ايستي من .” او بير فرهنگي عايله ده حيات كيچيريشي ني اورته گه قويب عايله سي اوني بير رسانه گه ايشلش دن حمايت ايتيشي راضي ايكني دن خرسندليگي اظهار ايتي.


خانم خالده جاري وضعيت دن تشويش ده ايكني ياشرمي ديدي:” تلويزيون ده ايشلش اوچون اويم دن چقيب دفترده بارگنيمچه يولده اختطاف بوليش دن هردايم خوف و تشويش ده من.” اما خالده بو وضعيت گه تسليم بولمي من و آلغه تمان حركت و كورشيم ني دوام ايتره من ديب تاكيدلشدي
باشقه تماندن شبرغان شهريده فعاليت قيله ياتكان “باتور” خلق ارا تلي كانالي خبر نطاقي فرزانه ديدي خبرنگارليك ايشي ده چوقر رغبتم بارليگي اوچون بو رسانه گه ايشلي من او علاوه ايتي :” افغانستان ايركك سالار بير مملكت دير و عموما قيز و عياللر اوي دن تشقريده ايشلش ده اجازت لري يوق.” او هرچند رسانه لرده ايشله ياتكان ايركك لرگه قرشي تهديدلر گوپيگن ديب اما عياللرگه برشي بو تهديد و معمالر ايككي درادر كوپ دير ديدي. بو ايال خبرنگار تاكيدلشدي:” بيز اوز مسوليت ميزني بجريش اوچون تعهد قيله ميز و كوشش ميز شوكه باشقه استعدادلي ياشلر بيزني ايزي ميزني دوام ايتره آلسه لر بو يولده قربان هم بولسك فرق قيلميدي.”
جوزجان ولايتيده دولت ملازملري و رسانه لرده خذمت قيله ياتكان عياللر امنيتي تهديدلرگه برشي مقاومت قيليش دن اونداي بير حالده سوز يورتيماقدع لر كه انسان حقلري فعاللري عياللرگه قرشي زوروانليك و تهديدلر كوپيگني دن تشويشلريتي اعلان ايتكنلر.بيرمدت دن بويان مملكت ده رسانه فعاللريگه قرشي تهديد و امنيتي خوف لر تاباره كوپيگن. رسمي معلوماتلرگه كوره اوتكن بير ييل جريانيده افغانستان ده اون خبرنگار ترور بولگن.بو ترورلر مسوليتي ني حاضرگه قدر هيچ بير گروه و شخص اوز بوينيگه آلمگن.