1396090914524911412650074

تاجيكستان ده كروناگه قرشي كورش موفقيتي

neshananews

neshananews

25 May 2020

كرونا ويروسي گه قرشي كورش ده دنياني تورلي مملكت لري جهان ساغليك ني سقلش تشكيلاتي توصيه لريني عملي قيلش دن علاوه اوز مملكت لري شرايط و امكانيت لريگه مطابق اقتصادي، اجتماعي وتعليمي ضرورتلرني تامين لشده تورلي دستورلري قول اوستيگه آلديلر.

افغانستان قوشني ليگي ده جايلشكن تاجيكستان، افغانستان بيلن تورلي قوشمه مدني، تيل و اقتصادي خصوصيت لرگه ايگه دير و كرونا ويروسي گه قرشي كورش ده موفق مملكت لر جمله سيدن دير چونكه بو مملكت كرونا ويروسي ييرليشي آلديني آليش و كنترول قيليش ده يخشي تجربه كسب ايتكن.

چيگره لرني ياپيش، چيت دن قيتيب كيلگن كيشي لرني قرنطينه ده سقلنيش، كروناگه قرشي كورش كميته سي ني ايجاد ايتيش، ياردم يتكزوچي مملكت لردن ياردم ايستش، حاجتمندعايله لرگه ياردم يتكزيش ني تيزلشتيريش، نقدي ياردم يغيش اوچون بانكي حساب آچيش، ساغليك ني سقلش ملازلرگه مخصوص امتيازلرني بيريش، دولت خادملري آي ليگي دن بير معين فايزني كرونا ويروسي حسابيده توپلش، اخبارات واسطه و ايريم ارگان لر آرقلي معلومات يتكزيش ني تيزلشتيريش، دارو و طبي اسباب اسكونه لرني ايشلب چيقاريش، مملكت پايتخت و ولايت لرده اوچ مينگ ياتاقلي و اولسوال ليك لرده ١٠٠ دن ١٥٠ ياتاقلي مخصوص كسلخانه لرني ايجاد ايتيش، تلويزيون و انترنت ارقلي مكتب درس لريني نشر ايتيش، نقاب و دستكش دن استفاده قيليش ني جبري لشتيريش، بيمارلرني اويلريده دوالش و كرونا ويروسي ني يوقتيرگن و شبهه لي كيشي لر بيلن تماس و علاقه قوريش مركزي ني ايجاد ايتيش، كرونا ويروسي گه قرشي كورش بويچه تاجيكستان مملكتي ني عمل گه آشيرگن ايشلري جمله سيدن دير.

 وقايوي چاره تدبير

تاجيكستان ده كرونا ويروسي ييرلگني ايلك كونلريده بومملكت چيگره لريني بوتكل ياپدي و آپريل آيي آخريده ١٥ مثبت واقعه ثبت بوليشي بيلن چيت دن قيتيب كيلگن كيشلرني قرنطينه قيليشي ني باشلب و چيت دن كيلگن هيچ بير شخص گه جماعه ده يورويش گه اجازت بيرمدي و ويروس ييرليشي آلديني آليش اوچون شهرلرده يومشاق قرنطينه ني جاري ايتي.

يومشاق قرنطينه ده جدي قرنطينه ني عكسيچه برچه اهالي ني اويدن چيقمسليگي توصيه قيلينمي دي، بلكه ضروري ايشلري بولمگن اهالي اوي لريده قاليب و باشقه لر ساغليك ني سقلش توصيه لرني رعايه ايتيش بيلن اوز كونده ليك فعاليت لريني دوام ايتيره آله ديلر.

بو مملكت چيگره لريني ياپيش دن آلدين تاجيكستان گه سفرقيلگن قريب ٦ مينگ كيشي ني قرنطينه قيليب و خارجي سفرلراوچون قيينت شرايط ني جاري ايتي.

تاجيكستان كوويد١٩ كسل ليگي گه قرشي كورش اوچون ١٨ مارچ كونيده ملي و محلي كميته لرني ايجاد ايتيب بو كميته فعاليت لريني تيزلشتيريش بيلن ينگي فعاليت لرني باشلدي.

جهان بازارلريده نقاب ، دستكش و ضرورت بولگن دارولرگه احتياج كوپيشي و نرخي كوتاريلگي گه قرگنده بو مملكت نقاب، محافظتي كييم و ضدعفوني ماده لرني كتته مقدارده ايشلب چيقارشي ني باشلب بيرتماندن بازار ضرورت ني تامين لشدي و باشقه تماندن ايچكي ايشلب چيقاريش چرخي ني فعال سقله دي.

تاجيكستان جمهورريسي برچه محلي و تومن مسوللري و ساغليك ني سقلش مسوللريگه كرونا ويروسي ني يوقتيرگن بيمارلرني سقلش و دوا لش اوچون هر بير تومن ده ١٠٠ دن ١٥٠ ياتاقلي كسلخانه ايجاد ايتيش ده بويروغ صادر ايتي.

بو مملكت بيمارلر و شفاكارلر ارا علاقه و تماس گروهي ني ايجاد ايتيش دن علاوه اوي لريده قرنطينه بولگن بيمارلردن خبردار بوليش اوچون شفاكارلر مخصوص گروهي ني ايجاد ايتيب بو بيمارلر ساغلگونچه كيركلي توصيه لرني يتكزه ديلر.

كروناگه قرشي كورش پروسه سيني موفقيت گه ايرشيشي اوچون بو مملكت خارجي و خلق ارا تشكيلات لر حمايتلريني جلب ايتيش ده موفق بولدي حاضرگه قدر اوزبيكستان،چين، روسيه، بيرلشكن ملت لر تشكيلاتي و باشقه بير قطار تشكيلات لر تاجيكستان گه طبي و تخنيكي ياردم كورستديلر.

عامه جايلر و شهرلرني هركوني ضد عفوني قيليش، اخبارات واسطه و حكومتي ارگانلر ارقلي معلومات يتكزيش،ماسك و دستكش كييش ني جبري لشتيريش و يومشاق قرنطينه ني جاري ايتيش، كروناگه قرشي تاجيكستان جمهوريتي نينگ وقايوي حركتلري جمله سيدن دير.

كرونا ويروسي گه قرشي كورشده محلي منبعلر و جهاني همكارليك لرني جلب ايتيش

تاجيكستان جمهوريتي كرونا ويروسي گه قرشي كورشده مالي كمكلرني يغيش اوچون ماليه وزيرليگي ده بير مخصوص حساب آچدي و حاضرگه قدر ١٢.٥ ميليون ساماني يعني ١ ميليون و ٢٥٠ مينگ دالر  بو بانكي حسابده ذخيره بولدي.

ملي كمپني لر،مملكت ايچكري سي و تشقري سيده گي تاجيكستانليك سوداگر و اهالي اوز ياردم لريني بو حساب گه انتقال بيرديلر.افغانستان بدخشان نينگ بهارك تومني شفاخانه سيده ساغليك ني سقلش خذمت كورسته ياتكان تاجيكستان ليك شفاكار قربان محمد ديدي او و بدخشان، تخار و كندز ولايت لريده گي بير قطار وطنداشلري اوز آي ليك و درآمدلريدن كرونا گه قرشي كورش اوچون كيرك لي ياردم لرني ساتيب آليب تاجيكستان گه جونتديلر. اوني ايتيشيچه تاجيكستان نينگ برچه يشوچيلري كرونا ويروسي گه قرشي كورش اوچون دنياني هرييريده بولسه لر تاجيكستان دولتي يانيده توريب وطنداشلريني بو مصيبت دن قوتقريش اوچون ياردم كورستيش ني وعده قيلگن.

حكومت عالي رتبه لي ملازم لريدن توتيب برچه اداره لر ريس و ملازم لري اوز آي ليك لريدن نيچه فايزيني بانكي حساب گه توكيب و شونينگ ديك تاجيكستان جمهورريسي بير آي ليك معاشي و وزيرلر ايسه ١٥ كون ليك معاشلريني بو حساب گه انتقال بيرديلر. عيني حالده تاجيكستان اسلامي مركزي رسانه لر آرقلي ذكات، حج خراجتي، خيرات و صدقه لريني كرونا بانكي حسابيگه و يا توغريدن توغري كسلخانه لرگه كمك قيليش ده اهالي ترغيب ايتكن.

بونگه علاوه اوزبيكستان،قزاقستان،چين، روسيه،هند ،آذربايجان و ايران تاجيكستان جمهورريسي ايستگي آرتيدن بو مملكت گه اوز ياردم لريني يوبارديلر.

حاجتمندلرگه ياردم يتكزيش ني تيزلشتيريش

اكثر شهرلرده قرنطينه جاري ايتيلگني و اقتصادي فعاليت لر توختتيلگن سبب اهالي دن اكثريتي كونده ليك ضرورتلريني تامين لشده قينلگني آرتيدن حكومت ياردم يتكزيش تيزلشتيريب و حاضرگه قدر پايتخت دوشنبه دن علاوه برچه ولايت لرگه كيركلي ياردم لر يتكزيلگن.

تاجيكستان مقاملريگه كوره بومملكت جمهورريسي ياردملري دارو و ساغليك ني سقلش ماده لر دير كه بدخشان ولايتي گه ٤٥ يوك تاشوچي كتته موتربيلن،سغدولايتي گه١٤٠ موتر، خطلان ولايتي گه٢٣٣ موتر رشت وادي سيگه ٤٠ موتر و شونينگ ديك دوشنبه اطرافيده جايلشكن ناحيه لرده جونتيلگن.

معلومات يتكزيش و تعليمي دستورلرني تيزلشتيريش

تاجيكستان ده كرونا ويروسي ييرلگني دن سونگ مي آيي اوليدن مكتب لر و مي ايي ١٥ كونيدن سونگ عالي اوقويورتلر تعطيل بولدي و حكومت تعليمي برنامه لر ني تلويزيون و انترنت ارقلي يولگه قويه باشله دي. رسميلرگه كوره شوحاضر كوپلب ابتدايي اورته و عالي مكتب لر شو سيستم لر ارقلي اوز درس لريني دوام ايتيرماقده لر.

تلويزيون ارقلي درس لر دوام ايتيب باريشي بيلن عيني زمانده، ساغليك ني سقلش توصيه لر ، اجتماعي مسافه رعايه ايتيليشي هركوني متخصص لر تمانيدن مردم گه يتكزيلماقده.

تاجيكستان حكومتي ايتكن كه كرونا ويروسي حقيده اهالي معلوماتي كوتاريش بيلن بو يوقمه كسل ليك ني يقين كيله جكده مغلوب قيله دي. دنيا ني كوپ مملكتلري كروناويروسي گه قرشي كورش ده تورلي خيل طريقه لردن فايده لنگنلر اما اولرنينگ موفقيتي ميزاني بيربيريگه تينگ ايمسدي،جهاني تجربه لرگه كوره كروناويروسي گه قرشي كورشده جدي بولگن مملكت لر يخشي راق موفقيت كسب ايتگن و عكسينچه جدي بولمگن مملكتلر بو توغريده اونچه ليك يوتوق گه ايريشمگن لر.اما تاجيكستان كوويد١٩ كسل ليگي گه قرشي كورشده موفقيت قازانب بو ويروس ني كنترول قيلگن.

رويخط ده آلينگن رسمي رقملرگه كوره تاجيكستان ده كرونا ويروسي تاپيلگني دن حاضرگه قدر ٢٥٥١ كيشي بو ويروس ني يوقتيرگن و بوندن ١٠٨٩ كيشي ساغلگن و ٤٤ كيشي اوزجاني ني قولدن بيرگن.