عیدی پولیس

جوزجان ده بيرقطار پوليس ضابط لري اوز آيليك لريدن بير مقداريني اوروش دن آواره بولگن باله لرگه ساوغه بيرگن

neshananews

neshananews

10 May 2021

جوزجان ولايتي امنيه قوماندان ليگي بير قطار ضابط لري مثلي كورينمگن بير انسان پرورليك حركت آرقلي اوز آيليك لريدن بير مقداريني نمازخرچي عنواني ايله اوروش سبب آواره بولگن عايله لرگه ساوغه قيلگن لر.بو پوليس منصبدارلري ٥٠ آواره باله لرگه كييم، اياغ كييمي مكتب اسيالري ساوغه قيلگن لر.
جوزجان پوليس سوزچيسي مسعود نديم بوكون ( يكشنبه ١٩ ثور) نشانه خبر آژانسي بيلن صحبت ده ديدي بو صاحب منصب لر آي ليك لريني آلگن دن سونگ بير مقداري ني اوز رغبت لري بيلن اوروش دن آواره بولگن باله لركه هديه قيلديلر. نديم جنابلري اميد بيلديردي كه هيت گه چه باشقه پوليس ملازملري هم بو ايش ني دوام ايتيريش ده حركت قيلسه لر. جوزجان امنيه قوماندان ليگي مسووللريگه كوره پوليس صاحب منصب لري نينگ بو حركتي مملكت حربي خذمت چي لريگه آواره لردن حمايه ايتيش توغريسيده يخشي اورنك بوله آله دي.
اوز عايله سيدن اوزاق ليكده جوزجان پوليس صفيده خذمت قيله ياتكان ضيالله عرب اوز آي ليكي دن بير مقداريني باله لرگه هديه قيلگن.بو ضابط ديدي آلگن آي ليكيم دن بير مقداريني عايلم گه جونتديم و بير مقداريني هم بو كم بغل باله لرگه تقديم ايتديم. او تاكيدلشدي بيز ياردم بيرگن باله لر اوروش و ناقرارليك سبب اوي جايلريدن آواره بوليب عايله لري بيلن شبرغان شهريده يمان احوال ده كون كيچيرماقده لر.
سونگي ييل لرده مملكت شماليده يوز بيرگن اوروش و توقنشولر سبب كوپلب عايلع لر اوز اوي جاي لريدن آواره بوليب شبرغان شهريده باش پناه آلگنلر. شبرغان شهريده پوليس صفيده خذمت قيله ياتكان ولي محمد چريك بو خصوص ده ديدي بو باله لردن بير قنچه سي سونگي اوروشلرده اوز سرپرست لريني قولدن بيرگنلر و حاضر خيابانلرده آغير ايشلرني بجريش بيلن عايله لري روزغاريني تامين ليديلر.
چريك جنابلريگه كوره اوروش دن تاثير لنگن بو باله لر برچه وطنداشلري خصوصا حربي ملازم لرگه حقلري بار و بو باله لرگه نمازخرچي بيريش پوليس ضابط و برچه ملازملريني قووانتيركن.


نورالله بوندن ايككي ييل آلدين فارياب ولايتي ني شيرين تگاب تومني دن عايله سي بيلن آواره بوليب شبرغان شهريده كون كيچيرماقده. او اون كيشي ليك بير عايله ده حيات كيچيره دي. آته سب ايران گه سفر قيلگن و حاضرگه اون بيش ياشده بولگن بو باله عايله سي روزغاريني تامين لوچي يگانه ايركك دير.
نورالله ني ايتيشيچه ايناغه و سينكلي لري اوتكن ايككي هيت ده ينگي كييم كيمگنلر. او بوييل پوليس صاحب منصبلري تمانيدن ساوغه بولگن كييم لرگه قول تاپيش دن جوده خرسند دير

اوروش سبب آواره بولگن بو باله جوزجان ده خيات كيچيره ياتكان باشقه آواره لرگه باي و بدولت كيشي لر ياردم كورستيش ده اميدي كاتته.
عيني حالده اوروش سبب آواره عايله سي بيلن بولگن محمد عزيز آته سيني بير ييل آلدين صياد تومنيده قولدن بيرگن. بو باله آلتي كيشي ليك بير عايله ده حبات كيچيريب تورتينچي صنف طلبه سي دير.
محمدعزيز كيله جك ده عسكر، شفاكار يا انجنير بوليش ني اميد قيلماقده. پوليس صاحب منصب لريدن ياردم آلگن بو و باشقه باله لر پوليس ضابطلزيدن قدردانليك بيلديريب و پوليس نينگ بو محبتي ني كورگني بيلن پوليس صفيده خذمت قيليش ده رغبتميز كوپيدي ديب ايتيشكنلر.
محمد عزيز رمضان كونلريده شبرغان شهريده آنه سي پيشيرگن بولاني لرني ساتيشه دي، اوني چين كونگلي ده گي آرزوسي سرپل ولايتي صباد تومنيده باريب عايله سي بيلن بيرگه تينچليك ده حيات كيچيريش دير.
جوزجان ولايتي قاچقينلر اداره سي تمانيدن نشر بولگن سونگي معلوماتلرگه كوره حاضرچه شبرغان شهريده، فارياب، سرپل و جوزجان ولايتي نينگ ناتينچ بولگن تومنلريدن آواره بولگن قريب ٢٠ مينگ عايله حيات كيچيرماقده.باشقه تماندن جوزجان ولايتي ايش و اجتماعي ايشلر اداره سي تمانيدن اوتكزيلگن تشكشيرو اساسيده بو ولايت ده ٥٠٠ گه يقين باله لر شهر خيابانلريده آغير ايش و دستفروشليك قيليش بيلن شغللنه ديلر ، بر باله لردن اكثريتي اوروش سبب عايله لري بيلن آواره بوليب جوزجان ولايتي باش پناه آلگنلر.