سۉنگگی ایکّی کون جریانیده طالبان بدخشان نینگ ۱۵ تومنینی اۉز نظارتیگه آلدی
akbardashti
04 July 2021بدخشاندهگی محلي منبعلرنینگ تأکیدلشیچه، سۉنگگی ایکّی کون ایچیده بو ولایت نینگ ۱۵ تومنی طالبان جنگریلری تمانیدن قۉلگه آلینگن. محلي رسميلر ولایت نینگ بیر قطار تومنلری طالبلر قۉلیگه اۉتگنلیگینی تصدیقلهسه-ده، اولر قۉشیمچه تفصیلاتلرنی بیرمهگن. بیراق خوفسیزلیک کوچلری اوشبو تومنلر تېز آرهده طالبان نظارتی آستیدن چیقاریلیشیدن ایشانچ بیلدیرماقده.
محلي منبعلرگه کۉره، اوتکن ایککی کون جریانیده، تیشکان، تگاب، کیشم، یفتلپایان ، وردوج، درایم، شهربزرگ، رغستان، جرم، ارگو، کوهستان، یمگان، کوفاب، بهارک و زیباک تومنلری طالبلر تامانیدن باسیب آلینگن. بوندن آلدین ایکّی هفتهدن کمراق مدتده، بو ولایتنینگ خاش و ارگنجخواه تومنلری طالبان جنگچیلری قۉلیگه اۉتگن اېدی.
طالبلر اۉز نظارتلریدهگی تومنلرده بیرقطار شخصلرنی تومن حاکمی و حربي مسوول اولهراق تانیشتیریب و حکومت ملازملری و دوکاندارلردن اۉز ایشلرینی عادتدهگیدېک دوام اېتتیریشگه چقیرگنلر.
بدخشان ولایت حاکمی سوزچیسی بشیر صمیم، محلی حکومت، یۉقالگن حدودلرنی قَیتریب آلیش اوچون منتظم رېجهلری بارلیگیگه و تېز آرهده یۉقالگن حدودلرنی طالبان نظارتیدن چیقاریلشیدن ایشانچبیلدیرگن.
بدخشان حاکمی هم شونینگدېک، اهالینی خوفسیزلیک حالتیدن خواطرلنمسلیککه و اولرنی ایش و وظیفهلریده عادتدهگیدېک قتنهشیشگه چقیرگن.
بدخشان تومنلری بیر قطار اهالیسی خوفسیزلیک کوچلر و مردمی قوتلر بو حدودلرنی قوراللی تۉقنهشوولرسیز طالبانگه تاپشیرگن دېب دعوا قیلماقده. اولر نینگ سۉزلریگه کۉره، اوشبو کوچلر شهدا تومنیگه قرب آرقهگه چېکیشگن.
بیراق، طالبان نینگ بدخشان نینگ ۱۶ مهم تومنلرینی اېگهللب آلیشی، قالگن تومنلر و بدخشان مرکزی فیضآباد شهرینی قملیني تارراق قیلگن.
اهالی نینگ آگاهلنتیریشیچه، اگر وضعیت شندایدوام اېتسه و حکومت یۉقالگن حدودلرنی قَیتریب آلیش اوچون جدّي چارهلر کۉرمسه، قالگن تومنلر و حتا که فیضآباد شهری اېنگ قیسقه وقت ایچیده طالبان قۉلیگه توشیب قالیش خوفی موجود دیر.
