مملكت ده كرونا ويروسي ييرلگني بيلن عيني دمده، اوته خطرلي بولگن محرقه كسل ليگي هم هرات ده اوج آلماقده. بو ولايت ساغليك ني سقلش مسوللري گه كوره ايريم عايله و شفاكارلر بو كسل ليك ني توغري تشخيص قيله آلمسليك لري سبب احتمال بيمارلرني اوليميگه توگن سه. بو مسوللر اگر عايله لر محرقه نشانه لريني بيمارلرگه كورسه لر اولرني ساغليك ني سقلش مركزلرگه يتكزيش لري لازم ديديلر.

هرات مركزي كسلخانه سي مسوللري بوكون (پنجشنبه ٢٢ جوزا ) نشانه خبر آژانسي بيلن صحبت ده، محرقه بيمارليگي كرونا ويروسي بيلن عيني پيتده ييرلگن ديدي. بو شفاخانه باش طبيبي محمدعارف جلالي ديدي هرچند ايسيغ آي لرده محرقه بيمارليگي هرات ده هرييل تاپيلردي اما بوييل بو كسلليك تيزراق تاپيلگن. جلالي جنابلريگه كوره اوتكن ٤٥ كون دواميده هرات مركزي كسلخانه سيده محرقه كسل ليگي ني يوقتيرگن اينگ آز ٣٥ بيمار ياتقيزيليب دوالنگن.

هرات مركزي كسلخانه سي باش طبيبي علاوه ايتي محرقه كسل ليگي گه چلينگن بير قطار بيمار، كرونا ويروسي ني يوقتيرگن تصوري بيلن شفاخانه گه مراجعه ايتميديلر. او ديدي محرقه كسل ليگي اگر كرونا تشخيص بولسه بيمار جاني ني قولدن بيريشي ممكن ديدي.

هرات مركزي شفاخانه سي شفاكارلري هم محرقه كسل ليگي كرونا ويروسي گه اوخششي تي تاكيدليدي لر. شفاكار همايون واحدي ديدي ايسيتمه، جان آغريغ و ضعيف ليك محرقه و كرونا ويروسي قوشمه نشانه لري جمله سيدن دير. او علاوه ايتي اگر بيمارلر كسل ليگي انيقلنمسه و بيمار كرونا ويروسيني يوقتيريش ني تصور قيليب و شفاخانه گه مراجعه ايتمسه اوني حياتي خطرگه توششي ممكن.

واحدي جنابلري ديدي شفاكارلر بيمارليك ني انيق لش بيلن اوني دوالنيشي ده موفق بوليش لري ممكن.شو سبب دن شفاكارلر مردم دن طلب ايتماقده لر كه اگر بو بيمارليك نشانه لريني كورسه بيمارلريني كسلخانه گه كيلتيريش لري لازم ديدي.

محرفه بير ميكروبي و عفوني كسل ليك دير و ادملري هاضمه سيستم گه هجوم اويشتيره دي. ايسيتمه، جان آغزيغ و خسته ليك بو بيمارليك نشانه سي دير كه كرونا كسل ليگي بيلن چندان فرقي يوق، اما شفاكارلرگه كوره يوتل و نفس بوغليشي كرونا ويروسي علامه سي دير.