ولایت کېنگاشلری خوفسیزلیک کوچلریدن حمایت‌ایته‌دی؛ دواطلب کوچلر خوفسیزلیک ارگانلر دایره‌سیده تشکیل اېتیلیشی کېره‌ک
neshananews
05 August 2021مملکت نینگ ولایت کېنگاشلری اعضالری مملکت خوفسیزلیک کوچلرینی طالبانگه قرشی بیرگه‌لیکده قۉللب -قوّتلب، طالبانگه قرشی کوره‌شیش اوچون داوطلب و اختیاری کوچلرنی خوفسیزلیک ارگانلر دایره‌سیده تشکیل اېتیش کېره‌کلیگینی ایتکنلر.
ولایت کېنگاشلری رهبرلری بوگون (پنجشنبه ۱۴ اسد) جمهوررییس غنی بیلن اوچره‌شگندن بیر کون اۉتیب کابلده‌گی مطبوعات انجمنیده قتنشب و مملکت خوفسیزلیک کوچلرینی قۉللب -قوّتلشینی اعلان قیلدی.
ولایت کېنگاشلری اعضالری نینگ قۉشمه بیاناتیده ایتیلیشیچه، بو کېنگاش اعضالری سۉنگگی ایگیرمه ییل ایچیده اېریشیلگن یوتوقلرنی و مملکت خوفسیزلیک کوچلرینی قۉللب -قوّتله‌یدی.
بیاناتده طالبان مملکتده‌گی دیني، اسلامي و بشری قدریتلرگه حرمتسیزلیک قیلگنی اوچون تنقید قیلینگن. بیاناتده ایتیلیشیچه، طالبان خلق نینگ تینچلیککه چقیریغیگه جواب بېرمه‌گن و عکسینچه اوروشنی کوچه‌یتیرگن.
بیاناتده کۉره، شو نینگ اوچون ولایت کېنگاشلری اعضالری خوفسیزلیک کوچلری یانیده بۉله‌دی و طالبانگه قرشی توره‌دی.
بیاناتده بیرلشکن‌ملتللر‌تشکیلاتی، امریکا و خلق‌ارا هم‌جمعیت دن بو حساس شرایط ده، افغانستان جمهوریتی‌نی قۉللب -قوّتلشگه چقیرگن.
بو آره‌ده، اوچ کون آلدین جمهوررییس غنی طالبانگه قرشی ملي سفربرلیک اعلان قیلدی. کېین هرات، کابل و باشقه ولایتلر اهالیسی “اللّه اکبر” تکبیرلرنی ایتیب، خوفسیزلیک کوچلرینی قۉللب -قوّتله‌دیلر.
سۉنگگی کونلرده بو رمزي شعار خوفسیزلیک کوچلرینی قۉللب -قوّتلش و خلقنی طالبانگه قرشی سفربر قیلیش نینگ اېنگ مهم شعاریگه ایلندی.
