کریمه اکبری: جماعه‌ده حربي فعالیت‌لر هنوزگچه اېرککلر وظیفه‌سی حسابلنه‌دی
neshananews
12 July 2021ایکّینچی سارن کریمه کمسان اکبری، بوندن ېتتی ییل آلدین، حربی ایشلرده قیزیقنی و عیاللرنی رولی‌نی حربیلر صفیده قوللب قوتلش مقصدی بیلن، اسمی‌نی جوزجان پولیسی رۉیخطی‌گه کیریتی. کریمه حاضرچه روسيه فدراسیونسیده حربي طلبه اوله‌راق تعلیم کورماقده. او تۉرت ییل جوزجان پولیس قوماندانلیگی جنایتچیلیککه قرشی کوره‌ش بۉلیمی نينگ سواداورگتیش اداره‌سي باشلیغی اۉرین‌باسری بۉلیب ایشله‌گن.
اکبری خانم اوچ ییلدن بویان روسيه نینگ اریوال شهریده‌گی حربي عالي‌اوقویورتیده حربي ساحه ده تعلیم آلیش بیلن شغللنماقده. او آلتی ییل دوامیده بو عالي درگاه‌ده اۉقیشی و عملي حربي تیارگرلیکدن اۉتیشی رېجه‌لشتیریلگن. حاضرگچه او اوچ ییللیک تعلیمنی تمامله‌گن. کریمه اکبری اداره و دیپلوماسی بویچه عالي تعلیمات گه ایگه دير. روسيه‌ده حربي تعلیماتی‌نی دوام اېتتیریش اوچون باریشدن آلدین او تورکيه‌ده آلتی آیلیک دستلبکی حربي تیارگرلیکدن اۉتگن.
اکبری خانم تۉرت آی دوامیده افغانستان ایچیده حربي تیارگرلیک و پرنسیپلر، مدافعه تاکیتیکی، کَلاشنیکوف‌نی آلیب یوریش و اۉق آتیش کبی ساحه‌لرده تعلیم کورگن. کریمه‌گه کۉره، پولیس، حربي فعالیت، سواد و قانونچیلیک نقطه‌ی نظریدن اۉز کسبینی یخشی بیلیشی کېرک. اوشبو پولیس عیال حربي ساحه‌ده ایشله‌گن ېتتی ییل دوامیده کۉپ پستلیک – بلندلرنی باشدن کېچیرگن. او کوره‌ش نینگ شیرینلیگی بیلن هم اچّیق تجربه‌لرنی باشدن کېچیردی. اونینگ سۉزلریگه کۉره، افغان عیاللری جنگ قیلیش اوچون اوزاق یۉلنی تنلشلری کېرک. اما حربي ساحه‌ده، کریمه نینگ فکریگه کۉره، سۉنگگی ۲۰ ییل ایچیده عیاللر تاباره کۉپراق عدالت و اولر نینگ حقوقلری اوچون ایش آلیب بارگنلر و جمعیت و اېرککلرگه قرشی جسور و قۉرقمسدن کوره‌شیب کیلگنلر.
عینِ پیتده کریمه کمسان اکبری روسيه نینگ اریوال شهریده‌گی حربي و حقوق عالي اوقویورتیده امتحان تاپشیرماقده. نشانه خبرآژانسی بیلن صحبتده او ېتتی ییللیک حربي ایش و اۉقیش تجربه‌سیگه اېگه اېکنلیگینی ایتدی. اکبري خانم نینگ تأکیدلشیچه، جماعه هنوزگچه حربي فعالیتلرنی اېرککلر نینگ بورچی دېب بیله‌دی. اونینگ تأکیدلشیچه، اَیریم حاللرده بیر قطار اېرکک پولیس‌لر هم قیزلر و عیاللر نینگ اۉقیشی و رواجلنیشیگه حسد قیلیشه‌دی. خانم اکبری نینگ سۉزلریگه کۉره، حربي حرکتلر فقط جنگ میدانیده اېمس. اونینگ سۉزلریگه کۉره، حربي تعلیم حربي موفقیت نینگ ینه بیر یۉنه‌لیشی حسابلنه‌دی.
ېتتی ییل آلدین کریمه پولیس صفیگه قۉشیلگنده، جماعه و جمعیت نینگ عیاللرگه نسبتن قره‌شلری اوته فرقلی ایدی. جمعیت فکریگه کۉره، عایله‌لر قیزلرگه حربي خدمتده کمراق ایشلشگه هم رخصت بېریشگن. شو مناسبت بیلن، کریمه نینگ قۉشیمچه قیلیشیچه، آته‌سی خدمتی نینگ بیرینچی ییلیده پولیس‌ده‌گی ایشیده معماگه دوچ کېلگن و جمعیت اونینگ بورچیگه ناتۉغری نقطه‌ی نظر بیلن قره‌گن. اونینگ تأکیدلشیچه، بیرینچی ییلدن کېین عایله او بیلن بیرگه یشه‌گن و کېینچه‌لیک جمعیت نینگ اونگه بۉلگن قره‌شلری اۉزگرگن.
صحبت دوامیده کریمه خانم اېرکک عسکرلر نینگ عیال عسکرلرگه نسبتاً رشک و حسد مناسبتیدن شکایت قیلدی. اونینگ سۉزلریگه کۉره، بعضیده حتا اریوال شهریده هم افغان طلبه‌لری اونی اذیت قیلیشه‌دی. او دستلبکی ییللریده اېرکک هم‌کسبلری اونگه حسد طفیلی بعضی حربي ایشلرنی اۉرگه‌تمه‌گنلیگینی تأکیدله‌دی. اما افغانستان ایچکی ایشلر وزیرلیگی بو عیبلاولرنی بیر نېچه بار رد اېتکن.
کریمه کورشچی قیز و عالي تعلیمات گه ایگه بولگن پولیس صفتیده، روسيه‌ده آلتی ییللیک حربي تیارگرلیک و تعلیمات کورش، حربيلرنی هر جهتدن تیارله‌یدی، دېب حسابله‌یدی. عیال پولیس خادمی چېت اېلده حربي ساحه‌ده اۉقیش اوچون قیزلر اوچون امکانیتلر موجودلیگینی تأکیدله‌ماقده. اما افغانستانده‌گی کۉپلب عایله‌لر حلی هم قیزلریگه آلتی ییل دوامیده چېت اېلده اۉقیشگه رخصت بېرمه‌یدیلر.
کریمه خانم – روسيه نینگ اریوال شهریده حربي خدمتده اۉقياتگن یگانه افغان قیز دیر. اونگه کۉره، بوتون روسيه ده فقط تۉرت عیال حربي طلبه‌لر حاضر تعلیم آلماقده. کریمه‌نینگ فکریگه کۉره، افغانستان حربي بۉلینمه‌لری اېندی هر قچانگیدن هم کۉپراق عیال خادملرگه محتاج. اما او پولیس عیاللری اوچون تعلیم، قانون و مدني حق حقوقلری و وطنداشلیک حقوقی تۉغریسیده خبردارلیکنی مهم دېب بیله‌دی.
کریمه نینگ تأکیدلشیچه، طالبلر عیاللرگه مدنی فعالیت، اینیقسه حربي فعالیت بیلن شغللنیشگه هېچ قچان یۉل قۉیمه‌یدی. عیال پولیس خادمی نینگ سۉزلریگه کۉره، طالبلر نینگ عیاللرگه نسبتاً قره‌شلریده ایجابي اۉزگریشلر کیلمه‌گن.
بیراق، تینچلیک مذاکره‌لری باشلنگندن سۉنگ، طالبان عیاللرگه ایشلشگه و تعلیم آلیش امکانیتیگه اېگه بۉلیشلرینی ایتدی. اما گروه هنوزگچه عیاللر نینگ اردوده‌گی فعالیتی تۉغریسیده ایضاح بېرمه‌گن. او هر قنده‌ی افغان عیالی سینگری طالباندن تینچلیک ایسته‌یدی. کریمه خانم مکتب‌نی توگه‌تگندن سۉنگ مملکتگه قَیتیشینی و ایچکی ایشلر وزیرلیگی دایره‌سیده خلق‌گه خدمت قیلیشینی ایته‌دی.
کمسان خانم تأکیدلشیچه، افغان عیاللری و قیزلری اۉزلری نینگ مدنی قدریتلری، عملیاتی و یوتوقلری افراطی گروهلر تامانیدن آیاق آستی قیلینیشیگه یاکه سوداسیگه یۉل قۉیمسلیکلری کېره‌ک. او افغانستان عیاللرینی اوشبو اوزاق کوره‌شده بیرگه‌لیکده ایشلشگه و اۉز آوازلرینی کۉتاریشگه چقیردی. کریمه روسيه‌دن افغانستانگه هراوچ ییلده بیر مرته کېله‌دی.
او ني معلوم قیلیشیچه، اولر حربي تیارگرلیک نینگ عملي و نظري قِسمیده درس اوقیماقده. عینِ پیتده کمسان اکبری اۉقیشدن تشقری، روسیه‌ده روحشناسلیک و حقوقي کتابلرنی اۉرگنماقده. او پولیس‌گه اوشبو کتابلرنی اۉقیشنی ضرور دېب حسابله‌یدی. اونینگ فکریگه کۉره، روحشناسلیک تدقیقاتلر پولیس‌گه جمعیت و آدملرگه یخشی یاردم اېتکزیشده کمک بېره‌دی.
کمسان خانم جوزجان ولایتی مرکزی شبرغانده ېتتی کیشیلیک عایله‌ده توغیلگن؛ جوزجان سۉنگگی ایکّی ییل ایچیده عیال پولیس‌چیلر سانی ۱۰۰ نفرگه اېتگن ولایت دیر . اوشبو معلومات عیاللرنی پولیس‌گه جلب قیلیش بۉییچه جوزجاننی بیر قطار باشقه ولایتلردن اوستون قیلگنی همه گه معلوم.
