جاپان

جاپان و بريتانيا افغانستان دولتي گه مالي ياردملريني دوام ايتيره ديلر

neshananews

neshananews

24 November 2020

جاپان و بريتانيا تشقي ايشلر وزيرلري، ٢٠٢٤ ميلادي ييل گه قدر افغانستان دولتي گه مالي ياردملريني دوام ايتيريشي دن ايشانچ بيلديرديلر.

بريتانيا تشقي ايشلر وزيري دومينگ راب بوكون ( سه شنبه ٤ قوس) آنلاين آرقلي ژنوا كنفرانسي ده صحبتي ده، بريتانيا مالي ياردم لريني افغانستان دولتي گه دوام ايتيره دي ديب ايتي.

راب جنابلري بو مملكت ٢٠٢١ نچي ييل ده ١٥٥ ميليون پوند مبلغ ني افغانستان گه ياردم بيريشي ني تاكيدلب بريتانياني كمك لري ٢٠٢٤ ميلادي ييل گه قدر دوام ايته دي ديدي.

عيني حالده جاپان تشقي ايشلر وزيري موتگي توشيم هم بو مملكت ني افغانستان گه ياردم لري دوام ايتيب باريشي دن خبر بيردي.توشيم جنابلري جاپان افغانستان دولتي گه ١٨٠ ميليون دالر ياردم ني وعده قيليب بو مملكت افغانستان دولتي گه بوندن كوره كوپراق ياردم بيريش دن سوز بيردي.

جاپان تشقي ايشلر وزيري شونينگ ديك افغانستان تينچليك آقيمي گه توختليب، بو آقيم ني آلغه سوريليشي اوچون آتش كيسيم برقرار بوليشي ضرور دير ديب ايتي. توشيم جنابلري جاپان، افغانستان دولتي و طالبان گروهي ارا قطرده باشلنگن مذاكره لردن حمايت ايتيب بو مذاكره لر تينچليك كيليشوي گه سبب بوليب افغانستان ده اوروش گه نقطه قويشي لازم ديدي. جاپان تشقي ايشلر وزيري افغانستان نينگ ١٩ ييل ليك قدريتلري صلح دن سونگي دورده سقلنيشي كيرك ليگي ني تاكيدلشدي.

افغانستان اوچون ژنوا خلق ارا كنفرانسي اوتكن كوني سويس پايتختي ژنوا شهريده باشلندي. بو كنفرانس ده دنيا مملكتلري و خلق ارا تشكيلاتلرني ١٠٠ دن آرتيق نماينده لري اشتراك ايتكن.