WhatsApp Image 2020-03-18 at 4.16.27 PM

هرات ده كرونا گه قرشي كورش؛ ايككي هفته ده ١٠٠ ياتاقلي كسل خانه قوريله دي

neshananews

neshananews

19 March 2020

هرات ده كرونا ويروسي گه قرشي كورش اوچون جمهورريس مخصوص فرماني گه اساسا ٤٠٠ ميليون افغاني اجرتيلگني آرتيدن ١٠٠ ياتاقلي بير كسلخانه قوريليش ايشي باشلنگن.

هرات ولايت حاكمي عبدالقيوم رحيمي ني ايتيشيچه بوكسلخانه اون بيش دن ايگرمه كون گه قدر قوريليب ساغليك ني سخلش خادملري اختياريگه قويله دي. هرات حاكمي، بو شفاخانه آلدين دن تيارلنگن قطعه لر و ٢٠٦٤ مترمربع ييرده بير قبت ده قوريليشي ريجه لنگن ديدي.

بوكسلخانه ني قوريليشي ده اينگ آز ١٠٠ مهندس و ايشچي اوچ نوبت ده ايشلشماقده. بو شفاخانه كوييد ١٩ يا كرونا ويروسي گه چلينگن بيمارلرني دوالنيشي گه اجرتيلگن. هرات ده كروناگه قرشي كورش اوچون كيرك لي بودجه اوتكن نيچه كون جريانيده اجرتيلمگني هرات ايريم يشوچي لري و محلي رسمي لر اعتراضي گه سبب بولدي.

اما افغانستان جمهور ريسي محمد اشرف غني هرات اهالي سيگه يوله گن پيامي ده بو ولايت ده كروناگه قرشي كورش اوچون ٤٠٠ ميليون افغاني اجرتيلگني ني اعلان ايتي. بو بيلن بيرگه محلي ارگانلر پاليسي بوليمي باشليغي و كروناگه قرشي كورش فوق العاده كميته سي اعضاسي حامدكريمي بو مبلغ هرات گه انتقال تاپكني دن خبر بيرگن.

كريمي جنابلريگه كوره مثلي كورينمگن بير حركت ده هرات گه اجرتيلگن بو ٤٠٠ ميليون افغاني برچه سي اوچ ساعت مدتيده هرات ولايتي مستوفيت اداره سيگه انتقال تاپدي ديب ايتي.

كرونا ويروسي گه قرشي جدي كورش بويچه جمهور ريسليك سراي نينگ قرتكن اعتباري آرتيدن افغانستان عامه ساغليك وزيرليگي هم كرونا ويروسي نينگ انيق لش امكانيت و لابراتواري كيت لريني هرات گه انتقال بيريلگني دن خبر بيرگن.

بو وزيرليگ سوزچي سي وحيدمايار ديدي كرونا ويروسي ني انيقلش كيت لري يقين كيله جكده هرات و بلخ ولايتلريده فعاليت باشليدي و كرونا ويروسي لابراتواري اوچون كيرك بولگن زمان قيسقره دي ديدي. بوندن آلدين كرونا ويروسي گه چلينگن شبهه لي كيشي لر نمونه لري پايتخت كابل گه يوباريليب نتيجه سي نيچه كون دن سونگ معلوم بولردي.

هرات محلي اداره سي سونگي حركتلري و مركز تمانيدن اجرتيلگن مبلغ هرات ولايت كينگاشي نماينده لري تمانيدن آلقيشلنگن. هرات ولايت كينگاشي نماينده سيي نوراحمد حيدري ديدي اجرتيلگن مبلغ يخشي باشقريلسه و مسوللر ايشلريده شفافيت بولسه كرونا گه قرشي كورش يوليده موجود برچه معمالر برطرف ايتيله دي.

باشقه تماندن ايران دن افغان مهاجرلرني قيتيب هرات گه كيليش لري آرتيدن، كرونا ويروسي ييرليشي دن خوف و تشويشلر كون اوتيشي بيلن ارتيب بارماقده. اوتكن بير آي جريانيده قريب ١٠٠ مينگ افغان مهاجر هرات ولايتي ني اسلام قلعه بندري آرقلي هرات گه كيلگنلر اما ايران نينگ خراسان رضوي ولايتي مهاجرلر اداره سي مسوللري،٢٩ نچي حوت كونيدن باشلب ينگي ييل بيشينچي حمل كونيگه قدر افغانستانليك مهاجرلر قيتيشي، ايران ده ينگي ييل مناسبتي اوچون تعطيل ليك سبب توختتيلر ديب اعلان ايتكن.