صلح مصلحتي لويه جرگه ريسي عبدالله عبدالله، طالبان نينگ تورت يوز محبوسي قويب يوباريليشي اوچون كميته لر قراري يكوني باسقيچي توپلنيب بوكون اعلان ايتيليشي ني ايتكن.
عبدالله جنابلري بو موضوع ني بوكون (شنبه ١٨اسد ) تويتر صحيفه سيده يازگن.
بو مصلحتي جرگه ريسي گه كوره ٥٠ كميته دن ٣٣ كميته اوتكن كوني يكوني قرارلريني بوجرگه اداري هياتي گه تاپشيرگن. قالگن كميته لر بوكون توش سونگ گه چه ايشلريني يكونلنتيريب قرارلريني جرگه رياستي گه تاپشيره ديلر.
عبدالله جنابلريني تاكيدلشيشيچه بو قرارلر توپلنيشي بيلن طالبان نينگ ٤٠٠ محبوسي قويب يوباريليشي حقيده و شونينگ ديك صلح مذاكره لريگه تيگيشلي موضوع لر بويجه لويه جرگه يكوني قراري بوكون اعلان ايتيله دي.
صلح مصلحتي جرگه سي ايككي كون مدتيده( ١٧ و ١٨ اسد) كابل شهريده يولگه قويلدي. و بوكون ايشي يكون تاپه ياتكان بو جرگه ده طالبان گروهي نينگ ٤٠٠ خطرلي محبوسلري قويب يوباريليشي حقيده قرار آلينه دي. بو محبوسلردن بيرقنچه سي اوليم گه جزالنتيريلگن.