افغانستان شماليده بليغ پيشيريب ساتيش اوتكن ييل لرگه قرگنده كوزگه كورنرليچه رونق تاپكن و يوزلب كيشي بليغ پرورشي و ساتيش يوليدن روزغار اوتكزه ديلر.

بيرييل دن بويان شبرغان ده زراعت اداره سي همكارليگي بيلن بليغ پرورشي مركزلري ايجاد بوليب ايش باشله گن.

جوزجان ولايتي دهقانچليك و چاروادارليك اداره سي ريسي محمدعالم عالمي نشانه خبر آژانسي بيلن صحبت ده بو توغريده ايتي:”زراعت اداره سي فعاليت لريدن بير قسمي بليغ پرورش فارم لرني ايجاد ايتيش دير و  زراعت اداره بو توغريده سرمايه ياتقيزيش گه قيزيق ياتگان كيشي لرگه تخنيكي ياردم بيريب و بعضي كيشي لرگه كيچيك بليغ هم ترقته دي”.

شبرغان افغانستان نينگ ايچيم ليك و دهقان چليك بويچه سو كمچيليكي گه دچار بولگن ولايت دير.

عالمي جنابلري گه كوره اوتكن بير ييل ده شبرغان ده ايككي بليغ پرورش بيروچي فارم ايجاد بولگن، زراعت اداره سي ، تخنيكي همكارليك كورستيشدن علاوه كيجيك بليغ لر هم بو فارم لر اختياريگه قويگن.

جوزجان ولايتي زراعت اداره سي كيله جكده هم بليغ پرورس فارمي ني ايجاد ايتماقچي بولگن شخصلرگه ياردم بيريش ده تيارگرليگي ني اعلان ايتكن.

زهير قريب ايككي ييل الدين شبرغان شهريده بير لك افغاني سرمايه بيلن بليغ فارمي ايجاد قيلگندي، او ايشي حقيده ايتي:” مين شبرغان ده ايلك بار بليغ پرورش فرامي ني ايجاد ايتديم و يقين كيله جكده باشقه بير فارم هم ايجاد ايتماقچي من. حاضرچه هر كوني ٣٠ دن ٥٠ كيلو بليغ ني شبرغان  بازاريگه ساتماقده من.”

شبرغان ده بو فارم لر ايجاد بولگني دن علاوه هلي هم بازارني بليغ گه بولگن  ضرورتي باشقه ولايت لردن تامين بوله دي. همده جوزجان چيگره سيده اقه ياتگان امو دريا دن هم بليغ آوچيلري بازار گه بليغ كيلتيريب ساته ديلر.

شبرغان شهري مركزيده بليغ پيشريب ساته ياتگان رستوران ايگه سي حميدالله نشانه خبر آژانسي بيلن صحبت ده ايتي:” جوزجان ده بليغ ساتيش و پيشيريش ايشي اوتميشگه قرگنده رونق تاپكن، هركوني شبرغان ده بيش يوز كيلو بليغ ساتيله دي.

بيرقطار ولايت لر جمله دن بدخشان، فارياب، سرپل و كندز ده بليغ ساتيش و پيشيريش بيلن شغللنگن حميدالله بو ولايت يشوچي لري بليغ كه قيزيقيش لري اوتميش دن كوره كوپراق بولگن ديدي.

هرچند افغانستان شمالي ده مصرف بوله ياتگان بليغ لردن كتته قسمي جلال آباد شهريدن كيلتيريله دي، اما بدخشان ، فارياب،كندز،بغلان و جوزجان امو دريا قرغاغيده جايلشكني اوچون بو ولايت لرنينگ بيرقطار اهالي لري بودريادن بليغ آولب بازارلرگه ساتيشه ديلر. مردم ايسه فارملرده يتيشتيريله ياتگان بليغ لردن كوره دريا بليغي گه كوپراق قيزيقه ديلر. امودريا دن آولنگن بير كيلو بليغ ٥٠٠ افغاني دن ٨٠٠ افغاني گه چه ساتيله دي.، حالانكه فارم بليغي نرخي٢٥٠ افغاني دير.

حاضرچه ليك جوزجان ولايتي ده ايككي بليغ پرورش فارمي بار، هر فارم ده ايككي مينگ بليغ پرورش بوله دي.