صلح كيليشونامه سي امضالنگني؛ اميدلر و تشويش لر
neshananews
07 March 2020امريكا قوشمه ايالت لري و امريكا ارا صلح كيليشونامه سي امضالنگني اهالي ارا كوپلب خوشبين ليك و خواتيرلرگه سبب بولگن، بيرقطار سياسي، اجتماعي و مدني فعاللر بو كيليشونامه امضالنگني دن خوشبين ليك اظهار ايتيب و بيرقطارلري هم جاري وضعيت دن تشويش اظهار ايتماقده لر.
افغانستان ده دايمي تينچليك گه ايريشيشي اوچون آيدين ليك تاپيلگني دن خوشبين ليك و خواتيرلر هم جاري وضعيت چيگيللنيشي و اجتماعي و سياسي جنجال لر خطريني كوپيتيرگن.
صلح كيليشونامه سي متني گه اساسا ١٤ آي گه چه افغانستان ده گي خارجي حربي بومملكت ني ترك ايتيشي، بيش مينگ طالب محبس لردن قويب يوباريليشي افغان لر ارا تينچليك مذاكره لرني توغريدن توغري باشلنيشي و طالبان ايسه تروريستي گروه لر بيلن علاقه لريني كيسيشي و اولرگه قرشي كورشي و عيني دمده امريكا اگر طالبان بو كيليشو ماده لريني توله عملي قيلسه بوگروه ني نشان گه توتمسليگي تاكيدلنكن.
بو كيليشو امضالنگن دن سونگ افغانستان جمهورريسي افغان لر ارا مذاكره باشلنيشي دن آلدين طالبان محبوس لري قويب يوباريليشي بيلن مخالف ايكني ني ايتي و طالبان گروهي هم زوروانليك لرني كميشي هفته سيدن سونگ امنيتي قوتلرگه قرشي هجوملريني باشله ديلر و بو وضعيت صلح مذاكره لري جرياني ني حاضرگه قدر باشي بيك كوچه گه آليب بارگن گه اوخشي دي. باشقه تماندن امريكا تشقي ايشلر وزيز مايك پامپيوني ايتيشيچه بو كيليشونامه محرم و ياشيرين بوليم لرگه هم ايگه دير وطالبان گروهي و امريكايي مقام لردن باشقه گروه و كيشي لر اوني ماده لريدن باخبر ايمسلر.
بو محرم كيليشونامه ده امريكا و طالبان ارا قنداي كيليشولر حاصل بولگني، طالبان غلبه قازانيشلري اوچون تبليغات لري،امريكا تمانيدن بو گروه محبوس لري قويب يوباريليشي گه داير ايشانچ و غرورلري آرتكني و امريكايي مقاملرني بو ماده لرني عمل ده جاري ايتيش ده جدي ايكن ليك لري بوني كورستماقده كه بو كيليشونامه ني محرم بوليم لري امريكا و طالبان گروهي نينگ طلب و ايستك لريني عملي بوليشي دن درك بيره دي و انه شو موضوع افغانستان حكومتي ، سياسي گروه لر و مملكت ضيايي لريگه خطر و خواتير توغديرگن.
افغانستان تينچليك و اوروش حكايه سي بو كيليشونامه امضالنگن دن سونگ چيگلشيب نيچه قره لي بولگن.طالبان گروهي امريكايي حربي لرگه قرشي اوروش و هجوم لريني توختتگني بيلن عيني دمده افغان امنيتي قوتلرگه قرشي هجوم لريني كوپيتيرگن.
سياسي تحليلچيلرگه كوره اگر طالبان افغانستان حكومتي ني رسميت گه تاني مس ليگي گه داير ادعالريني تكرارلب و اسلامي- طالباني امارت ني ايجاد ايتيش ده سعي و حركتلريني كوپيتيرسه و افغانستان حكومتي و اهالي سي تينچليك سيورليك طلب لريگه اعتنا قيلمسه شبهه سيز افغانستان ده ٤٠ ييل دن بيري دوام ايتيب باره ياتگان جنجال و توقنشولر ينه هم مردم دن قربانليك آليب و صلح و تينچليك گه ايرشيش ني قيينت و ناممكن قيله دي.
ييل لرچه اوروش و ناتيچليك دن عذاب چيككن مردم، افغان لر ارا صلح مذاكره لر باشلنيشي و ايگرمه ييل جريانيده مينگلب كيشي قاني بهاسي بيلن حاصل بولگن انسان حق لري،عياللر آزادليگي،سوزايركين ليگي و دموكراتيك قدريتلر بو مذاكره لر قرباني بولمسليگي ني كوتماقده لر.
بدخشان ولايتي سياسي فعاللريدن بيري غلام حيدر آتش پور طالبان و امريكا ارا امضالنگن كيليشودن خوشبين ايكني ني ايتيب بو زمينه مساعد ايتيليشي بيلن تينچليك مذاكره لري سونگي باسقيچي باشلنيشي و افغانستان ده دايمي صلح تامين لنيشي ده اميد باغله گن ديب ايتكن.
آتش پور جنابلري اما طالبان گروهي نينگ اسلامي امارت قدريتلريگه اساسا حكومت ايجاد ايتيش ده تاكيدلري ايگرمه ييل جريانيده حاصل بولگن يوتوق لرني خطرگه ساليب اگر طالبان بوكيليشو ماده لريگه عمل قيلمه سه افغانستان ده اوروش و سياسي تارتيشولر شدت آليشي دن تشويش ده بولگني ني ايتكن.
بدخشان دين عالم لريدن بولگن مولوي محب الله شريفي ديدي بيز صلح مذاكره لري نتيجه سيده اميدلي ميز و امريكا و طالبان ارا امضالنگن كيليشوني آلقيشلي ميز و افغانستان ده هرتمان له مه تينچليك برقرار ايتيليشي وقتي گه چه خلق ارا قوتلر افغانستان خلقي يانيده توريش لريني ارزو قيله ميز .
بو دين عالمي افغانستان خلقي اوروش دن خسته بولگني ني اورته گه قويب طالبان گروهي مهيا بولگن فرصت دن تينچليك اوچون فايده لنيب و اوروش دن قول تارتيش بيلن افغانستان ده بو قانلي اوروش گه نقطه قويش لري شرط ديب ايتكن.
بدخشان مدني فعاللريدن بيري عبدالبصير وثيق هم ديدي بيز امريكا و طالبان ارا امضالنگن كيليشو ني آلقيشلي ميز اما جاري وضعيت خصوصا حكومت رهبرلري و سياسي جريان لر ارا اتفاق و اجماع يوقليگي دن خواتيرده ميز و طالبان گروهي هم حكومت ني رسميت گه تاني مگني معما توغديريشي ممكن ديدي.
اونگه كوره اگر بو كيليشو گه اساسا خارجي قوتلر افغانستان ني ترك ايتسه لر مملكت رهبرلري ارا سياسي اتفاق، اجماع و بيردمليك يوقليگي، آغير توقنشو و تارتيشولرگه سبب بوليشي ممكن ديدي.
دين عالم لري، مدني فعاللر و سياستچيلرگه كوره اگر طالبان امريكا بيلن امضالشكن كيليشو دن باش تارتسه معلوم كه افغانلر ارا صلح مذاكره لري كتته كان توسيق لر بيلن يوزمه يوز بوليشي ممكن.
بو فعاللر جهان جماعتچيليگي،بيرلشكن ملت لر تشكيلاتي و امريكا قوشمه ايالت لريدن، افغانستان صلح پروسه سيني افغانستان حكومتي مالكيت و باشقروي بيلن آلغه سوريب بومملكت ده دايمي تينچليك تامين لنيشي زمينه سي مساعد ايتيليشي دن نظارت قيليش لري لازم ديديلر.
