جوزجان ولايتي عالي اوقويورتي نينگ ٣٠ طلبه سي ارا مناظره ” ياشلر ترقياتي” عنواني ده عياللر قرشي سيده تورگن قيينتچليكلرو اونگه ايچيم يول تاپيش مقصدي بيلن جوزجان اخبارات و مدنيت اداره سي همكارليگ بيلن اوچ كون مدتيده شبرغان شهريني لينكن مركزيده اوتكزيلدي.

جوزجان عالي اوقويورتي طلبه سي و ياشلر ترقيات گروهي باشليغي حبيب الله جويا بو مناظره حقيده نشانه خبر آژانسي گه ايتي :” ياشلر ترقيات گروهي رضاكارلري، اون بيش قيز و اون بيش ايركك طلبه لر ارا، اولكه ، دين و دموكراسي نقطه ي نظردن عياللر اوريني حقيده مناظره يولگه قويدي ديب ايتي.

جويا جنابلريگه كوره، بيز اوتيز طلبه اوچ كون مدتيده عياللر قرشي سيده تورگن معمالر و اوني ايچيم يوللري حقيده فكر المشتيرديك، بيزنينگچه ياشلر ارا بونداي مدني و انسان حقلري بويچه بحث لر و اهالي و خصوصا عايله اعضالري ارا رواجلنيب هربير شخص اوز حق حقوقي دن باخبر بوله ديلر.

ياشلر ترقيات گروهي جوزجان عالي اوقويورتي بيرقطار طلبه لري تشبثي بيلن ايجا بوليب مدني و رضاكارانه فعاليت لرني اوزيگه مقصد قيلگن.
وايه گه يتمگن قيزلرني تورموشگه چيقاريش، جبري اويلنتيريش، تعليم دن محروم بوليش، خيابانلرده اذيت بوليش،فزيكي ، لفظي و جنسي زوروانليك كبي موضوعلر افغان عيال وقيزلر قرشي سيده تورگن معمالر جمله سيدن بولگني بو مناطره ده تاكيدلندي.

سياست و ديپلوماسي طلبه سي، ياشلرترقياتي گروهي اعضاسي و بو مناظره قتنشچي سي بشيره، بو سوزلشو حقيده ديدي:” بيز بونداي انجمنلرني اوتكزيش بيلن ياشلر ارا مناظره و سوزلشو مدنيتي ني رواجلنتيره آله ميز و بونداي مناظره لر نتيجه سي و تكليف ايتيلگن ايچيم يوللر عايله لر ايچيده يول تاپيش گه سبب بوله دي.

بشيره خانم علاوه ايتي:” بيز بو مناظره ده دين و دموكراسي نقطه ي نظردن عياللر اورني بويچه بحث قيلديك و بو بحث لر عاقبتيده كوپ معمالر اشكار بولدي مثلا اوتكن اون ييل جريانيده عياللر افغانستان ده حكومتدارليك و سياست ساحه سيده حصه قوشيب بو ساحه ده يخشي يوتوق لر كسب ليتكنلر”.

بيشيره گه كوره حاضرچه ياشلر ارا اولكه ده ترقله ياتگان معلومات، عياللرگه قرشي زوروانليك لرني كميتيره آله دي و بونداي سوزلشولر عياللرگه نسبتا اهالي توشينچه و قرشلريني اوزگرتيريشي ممكن.

جوزجان عالي اوقويورتي طلبه سي لينه فيضي بو برنامه اوتكزيليشي دن خبر بولگني دن سونگ انجمن محلي گه كيلگن، اوني ايتيشيچه افغانستان ده خيابان آزارليك اينگ كتته معمادير و بونداي انجمنلرني اوتكزيليشي استه سكين اشتراكچي لر خصوصا ايركك لرگه تاثير يتكزه دي مثلا عياللر ، ايركك لر بيلن يان مه يان مدني فعاليت لرگه حصه قوشيش لريني هر بير ايركك كورگنده، قيز و عياللر كوچ و قابليت لريگه ايشانچ لري آشه دي.

عموما خارجي دونرلر تمانيدن مالي حمايت بولمگن و رضاكار طريقه سيده مدني فعاليت لرني ريجه لنتيريب اهالي معلومات و قابليت لريني آشيريش اوچون يولگه قويلگن بونداي يغين و انجمن لر اخبارات واسطه تمانيدن ياريتيلمي دي. ياشلر ترقيات گروهي، جوزجان عالي اوقويورتي طلبه لري تمانيدن ايجاد بولگن رضاكار بير گروه دير، بوگروه اعضالري ” مدني جماعه ” حقيقي معنا و سيماييني اولكه ده نمايش ايتيريش ده سعي قيليب كيلماقده.