رستورانت-1-790x550

اوقوتوچیلیك دن ايش يرتيش گه چه؛بدخشان ده عياللرگه اجرتيلكن ايلك رستوران

neshananews

26 April 2020

افغانستان نينگ عنعنوي جماعه سيده، عياللرني اوي دن تشقريده اقتصادي فعاليت و ايشلش لري بير تابو دير و اكثر عياللر اجتماعي چيكلولرو مدني ممانعتلر سبب اولكه نينگ سياسي، اجتماعي و اقتصادي ساحه لريده ارزگوليك رول اوينش دن محروم قیلگن.

بو اجتماعي چيكلولرگه قره مي بو تابولرني سينديريب بيرقطار اقتصادي ،سياسي و اجتماعي تشبث لرگه قول اوريب ايجادكارليك قيلگن عیاللرهم اولکه ده بار. بونداي عياللر بيرتماندن اوز قابليت و كوچلريني نمايش ايتيریب باشقه تماندن بيرقطار اونيتيلگن عياللرگه اويدن تشقريده ايش و درآمد زمينه سيني یرتگنلر.

بدخشانليك عياللردن بيري سمين كريمي اوقوتوچيليك دن علاوه اقتصادي فكريني عملگه آشيريب بدخشان مركزي فيض آبادشهريده عياللرگه اجرتيلگن ايلك رستورانت ايجاد ايتيب اوزي و باشقه بير قطار عياللرگه درآمد زمينه سيني مساعد ايتكن.

خانم كريمي ديدی عیاللر فعالیتی قرشی سیده تورگن اجتماعی و مدنی چیکلولر و ایشلش اوچون ایشانچلی فضا یوق لیگی سبب عیاللراوچون بو رستوان نی ایجاد ایتکن. او علاوه ایتی :« عیاللراوچون محدودیت لرکوپلیگی، اقتصادی ایشلرده عیاللرنی فعال قتنشمسلیگی و بدخشان ده عیاللرگه اجرتیلگن مخصوص رستوران بولمگنی بو ایشگه قول اورگنیم نی اساسی عاملی دیر و البته بو تشبث نیچه ییل دن بیری فکریم گه ایدی و بخت گه موافق منه عملگه اشیریلدی.»

خانم کریمی نیچه مملکت گه سفرقیلگنی و او مملکتلرده‌گی رستوان لردن اورنک آلگنی نی اورته گه قویب بدخشان مرکزی فیض آبادشهریگه عیاللرگه فرقیلی بیر رستوران ایجاد ایتیش ده موفق بولگنی دن فخرلنماقده.

اونگه کوره اوی دن تشقری ده‌گی فضالر عموما ایرکک لرگه خاص دیر و بو موضوع سبب عیاللر تورلی ساحه لرده حصه قوشیش اوچون تورلی خیل چیکلو و محدودیت لرگه دچاردیر لر. بو بدخشانلیک عیال دیدی فیض آبادشهریده عیاللرمهماندارلیگی و یا یغین اوتکزیش و بیران تفریحی برنامه لرنی یولگه قویش اوچون هیچقندای مخصوص و مناسب جای نظرده توتیلمگن و شونی اوچون عیاللرگه خاص بولگن بو رستوران نی ایجاد ایتیش بیلن بو بوشلیک نی تولدیریش گه حرکت قیلگن.

خانم سیمین کریمی بو فکرینی عمل ده جاری ایتیش اوچون عایله اعضاسی رضایتی نی کسب ایتیشی لازم ایدی. خانم کریمی بو حقده دیدی:« عایله م نی کوندیریش اوچون کوپ وقت صرفلندی چونکه بیررستوران مسولی اوله راق فعالیت قیلیش و مشتری لرنی کوتیب آلیش کبی موضوع لرنی عایله م قبول قیلمسدی و بونی اویتلی بیر ایش بیلردی.»

افغانستان کبی عنعنوی بیراولکه ده هر بیرعایله نینگ نیکنام لیک وبدناملیک معیاری عایله عیاللری یوریش توریش لری بیلن تقاس لندی؛ یعنی بیرعیال اوییده اولتیریش بیلن عایله سیگه نیکناملیک کسب ایتسه ده، اویدن تشقریده چیقش بیلن عایله نینگ اخلاقی اقتداری سوال آستیگه قالیب و نیکنام لیک قصری ویران ایتیله دی.

بونگه قره مسدن خانم کریمی عایله سی نی قناعت بیریب فیض آبادشهریده عیاللرگه خاص بولگن ایلک رستوان نی آچیشگه موفق بولدی. او بو رستوران ایشی رونق تاپیشی حقیده دیدی رستوران آچیلگن کونلریده چندان مشتری میز یوق ایدی اما بو کسادلیک منی باشله گن ایشیم دن ناامید قیلمه دی بلکه رستوران ایشی نی روانق بیریش و بوجای نی بدخشانلیک عیاللر اوچون بیرایشانچلی و امن محل گه ایلنتیریش ده برچه سعی وحرکتیم نی یولگه قویش ده اونده دی.

   بو رستوران ایگه سی خانم کریمی علاوه ایتی کرونا ویروسی ییرلگنی دن آلدینگه چه هرکونی اونلبچه مشتری خصوصا عایله لربو رستوران گه مراجعه ایتردیلر اما کرونا ویروسی ییرلیشی دن سونگ باشقه اقتصادی فعالیت لردیک بیزنی رستوران میز ایشگی هم یاپیلدی.

 بو رستوران ایگه سی کرونا ویروسی یوقالگنی یا کمیشی بیلن عیاللرگه ایش زمینه سی نی یرتیش ده اوز مسولیت لرینی ادا قلیش نی امید قلیب دیدی کوپراق ایش زمینه لری تاپیلیشی بیلن بیرقطارعیاللرگه ایش زمینه سی نی یرتیش اساسی آرزوم دیر.خانم کریمی علاوه ایتی:« تازه لیکده ایجاد ایتکن بو رستوران یالغیز عیاللر و عایله لراوچون دیرو عایله اعضالری بیرگه لیک ده بورستوران گه کیله آله دیلر، البته کیله جک ده بدخشان مرکزیده باشقه بیرعمومی رستوران هم ایجاد ایتیش نی نظرده آلگن من.»

  باشقه تماندن بو بورستوران گه اوقات لنیش و یا اونی تماشا قلیش اوچون کیلگن عیال و عایله لربوندای فضا عیاللراوچون ایجاد ایتیلگنی آلقیشلگن لر. خانم کریمی نینگ مشتری لری بو رستوران ایجاد ایتیلگنی دن سونگ مهماندارلیک لری و بوش وقت لرینی بو محل ده اوتکزیش دن خرسند لیک بیدلرگنلر.رستوران مشتری لریدن بیری ماه جبین، بیرقنچه دوستلری وعایله اعضالرینی بو رستوران گه دعوت ایتیب مهمان قیلگن. او دیدی:« کرونا ویروسی ییرلیشی دن‌آلدین برچه مهمان لیک لریم نی بو رستوران گه آلردیم و حاضر کرونا ویروسی تاپیلگنی بیلن بیز بو رستوران گه باریش دن محروم بولدیک، البته اویده آله یاتکان مهمانلیک لرگه کیرک بولگن اوقات نی بو رستوران گه سفارش بیره میز و رستوران قیسغه وقت ایسته گن اوقات لریمیزنی جونته دی.» ماه جبین گه کوره بدخشان مرکزی فیض آبادشهریده بو رستوران ایجاد بولیشی دن آلدین، مین خواهرخوانده ، سینگلی لریم وهمکسب لریم بیلن وقتی میزنی اوتکزیش و مناسب اوقات صرفلش اوچون هیچ بیرمناسب جای یوق ایدی اما بو رستوران ایجاد بولگنی بیلن حاضر ایشانچلی و راحت فضا بیزعیاللراوچون مهیا بولگن.

 «کدبانو» رستورانی ایگه سی خانم کریمی دیدی عیاللر اگر انیق و ییریک مقصد گه ایگه بولسه لر برچه اجتماعی و عنعنوی محدودیت لرنی اورتدن کوتاره آله دی و ترقی و رواجلنیش ایشگی نی آچیش ممکن. او اجتماعی محدویت لر باعث اقتصادی ، اجتماعی و مدنی فعالیت لردن اوزاق قالگن عیاللردن ایستی دی که اوز مقصدلریگه ایرشیش اوچون ایجابی آدیم لرنی کوتاریش لری کیرک و چیکلولرنینگ بلند قلعه سی و تحجرپرده لرینی جسارت بیلن نابود قلیش لری لازم دیدی.

 هرچند اوتکن ایگرمه ییل دوامیده عیاللرحق حقوقلریدن حمایه ایتیش اوچون بیرقطار حقوق و قانونی ترماق لر مملکت و خلق ارا سطح ده ایجاد بولیب فعالیت قیلماقده اما افغانستان ده ایرکک سالارلیک کوچلی بولگنی سبب هلی هم عیاللر رولی اولکه ده اونچه لیک رواجلنمگن.

انسان حق لری خلق ارا اعلامیه سی، باله لر حق لری کنوانسیونی، ژنیوا کنوانسیومی، مینگ ییل لیک ترقیات دستوری، عیاللرگه قرشی هرقندای تبعیض منع ایتیلیشی کنوانسیونی، بیجینگ حرکتی پلاتفورمی، خلق ارا مقیاس ده خوفسیزلیک کینگاشی نینگ ۱۳۲۵ نچی قراری، افغانستان عیاللری اوچون ملی ایش دستوری، عیاللرگه قرشی زوروانلیک نی منع ایتکن قانونی، ملی و خلق ارا حمایت لرجمله سیدن دیرکه جهان مقیاسیده جنسیتی تینگ لیک دن حمایت ایتیب و عیاللرگه ایش و فعالیت قلیش زمینه سی نی مساعد ایتکن و بو قتلم نینگ قدرتلی حضوری نی اجتماعی ، سیاسی، اقتصادی و مدنی فعالیت لر ساحه سیده ضمانت قیلگن.