اوتكن ييل لرده عياللر گه تعليم زمينه سي مساعد بولگني بيلن بو قتلم نينگ اجتماعي، اقتصادي، مدني و سياسي ساحه لرده فعاليت لري هم كوزگه كورنرلي درجه ده آرتيب بارگن و خصوصا اقتصادي فعاليت لرده يخشي يوتوق لرگه ايريشكنلر.

اولكه ده مدني ممانعت لر و اجتماعي چيكلولر گه قرمي بير قطار عيال لر عالي تحصيلات ني بيتيريش دن سونگ دولت و نادولت ارگانلرده ايشلش دن علاوه بعضي لري شخصي تشبث لري ارقلي درآمدلي ايش زمينه لريني ايجاد ايتيب عايله لري روزغاريني تامين لشده موفق بولگنلر.

آخركي ييل لرده بيرقطار عيال لر بدخشان ولايتي ده نادولت ارگانلر حمايتي بيلن سوت  پروسيس كارخانه سيني ايجاد ايتيب كوپلب عياللرگه ايش زمينه سيني مهيا ايتكنلر.

بدخشان ده عياللر تمانيدن باشقريله ياتگان ٧ كارخانه آره سيدن بيري “صفا” سوت پروسيس كارخانه سي دير كه فيض آبادشهريده بيرعيال تمانيدن باشقريله دي.

بوكارخانه تورت ييل آلدين “افغان ايد” نادولت بير موسسه حمايتي بيلن ايجاد بوليب و حاضر ٥٠ كيشي گه ايش زمينه سي ني مساعد ايتكندن علاوه اوني محصولاتي فيض آباد شهري يشوچي لري احتياجليك لري كتته قسمي ني تامين لشماقده.

بو كارخانه مسولي آمنه رحيمي نشانه خبرآژانسي بيلن صحبت ده بوكارخانه محصولاتي بدخشان ده يخشي بازار تاپكني ني ايتيب بو محصولات ني بدخشان قوشني ليگي ده جايلشكن باشقه ولايت لرگه يوباريليشي اوچون سعي و حركت لري دوام ايتماقده ديدي.

بوكارخانه ده بيرقطارعياللر ايش بيلن بند، اولر بيرتماندن اوز عايله لري اقتصادي گه ياردم بيريب باشقه تماندن محلي اقتصادي ني روج رونقي گه كتته حصه قوشيب كيلگنلر.

بو كارخانه مسولي آمنه گه كوره اونينگ قتيغ محصولي بازارده يخشي خريدارتاپكن و اگر دولت و ياردمچي موسسه لر تماندن حمايت بولسه، اوز محصولات لري مقداري و صفتي ني يوكسلتيريش بيلن خارجي محصولات بيلن رقابت قيليش ده قادر بوله اله ميز ديدي.

آمنه ديدي:” من ، چيت دن وارد بوله ياتگان محصولات بيلن رقابت قيليش ني ايستي من، شوحاضر فيض آباد شهري يشوچي لريدن ٢٠- ٣٠ فايزي خارجي قتيغ دن استفاده قيلميديلر،اگر بيزنينگ ايشي ميز رونق تاپسه بيز اوز محصولات ميزني باشقه ولايت لرگه هم صادر قيله آله ميز “.

اونگه كوره بو كارخانه افغان ايد موسسه سي تمانيدن بيريلگن زمانوي ماشين لر بيلن جهازلنگن و هركوني ٣٠٠ ليتر سوت ني پروسيس قيليب محصولاتي ني بازارگه ساته دي.

امنه ني ايتيشيچه بوكارخانه درآمدي دن بخشي امكانات قولگه كيريتكن و بو درآمدي دن بيرقسميني كارخانه نينگ كونده ليك احتياج لرني تامين لب و باشقه قسمي ني ايشچي لر آي ليگي ني تامين لشده صرفليدي.

بدخشان محلي رسميلري هم عياللر نينگ اقتصادي فعاليتي آرتيب بارگني ني انگلب اولر ايشلب چيقاره ياتگان محصولات گه ياردمچي موسسه لر همكارليگي بيلن بازار تاپيش ده سعي قيليش لريدن سوزبيرگن.

بدخشان عياللر ايشلري ريسي گه كوره بوكارخانه ده ايشلب چيقريله ياتگان محصولات قوشني مملكتلردن وارد بولگن محصولات گه قرگنده صفتلي و خريداري كوپ. اوني ايتيشيچه محلي اداره لر بو محصولات گه مناسب بازار تاپيش اوچون، دولتي و نادولت اداره لر وبيرقطار هوتل لربيلن بو كارخانه محصولات لريدن استفاده قليش گه كيليشكن و صفا كارخانه سي محصولاتي ني اهاليگه تانيشتيريش اوچون كيله جكده تجارتي كورگزمه يولگه قويليشي ني ريجه لشتيرگنلر.

خانم غياثي گه كوره صفا كارخانه سي محصولاتي بازاري قيزيق بولگني و هركوني گوپ مقدارده سوت لازم بولگني گه قرگنده بدخشان نينگ اكثر قشلاق لريده چاروادارليك هم رواج رونق تاپكن و بير ييل آلدين بيش ته چارواني باقه ياتكان عايله بوكون ايسه ٥٠ چارواني پرورش بيرماقده و بو ايسه قشلاق لر يشوچي لري اقتصاديگه هم مثبي تاثير يتكزگن.

بدخشان عياللر اداره سي ريسي بدخشان مركزي و بيرقطار تومنلريده ايجاد بولگن بو كارخانه و عياللر تمانيدن باشقريله ياتكان باشقه كارخانه لرده خذمت قيله ياتگان عياللر اقتصادي وضعيتي هم يوكسلگن ديدي.

صفا كارخانه سي مسولي آمنه، قولگه كيريتكن برچه يوتوق لريني عمريولداشي همكارليگي بيلن حاصل بولگني ني ايتيب تنلشكن ايشي و حاصل بوله ياتگان درآمدي دن راضي ايكني تاكيد ليدي.

بوكارخانه ده ايشلش دن علاوه چاروادارليك بيلن شغلنه ياتگان حميده خانم، چاروادارليك محصولاتي عايله سي اقتصادي گه مثبي تاثير قالديرگني ني ايتيب برق انرژي سي كم چيليگي، سوت ني ساغيش اوچون منتظم جاي بولمگني گاهي وقت لر ايشلريگه خلل يتكزيب و محصولات لري مقداري پس گه توشيشي گه سبب بولگن ديدي.

اما بدخشان محلي مسوللري عيال چاروادارلر قابليت لريني يوكسلتيريش، منتظم ايش خانه لر ايجاد ايتيليشي، محصولات لري اوچون ايشانچلي بازار تاپيش مقصدي بيلن بير قطار تعليمي دستولرني يولگه قويليشي دن خبر بيره ديلر.