افغانستان ده حکومتدارلیک ینگی عصری، فرق لرعصری دیر. هرچند هلی هم ناتینچلیک، قشاقلیک و عدالت سیزلیک مملکت نینگ مدنی واجتماعی تیزیمی گه خلل یتکزماقده اما ینگی و یخشی اوزگریش لرهم یوزه‌گه کیلگنی سبب جماعه ، یاپیق حالت دن آچیق لیک وآیدینلیک تمان یول آچماقده. بو یخشی اوزگریش لردن بیری، عیاللر اورنی یوکسلگنی دیر. ینگی عصر بیرقطارجسارتلی عیاللرنینگ صحنه گه چیقیشی گه گواه دیر.عیاللر کوپلب قینتچلیک و معمالرگه قره‌می ایرکک لربیلن برابر و یان مه یان اوزلری و اولکه لریده‌گی شرایط نی اوزگرتیریش دن علاوه مثبی ایش لرنی هم بجرماقده لر.

بوجسارتلی عیاللردن بیری نجیبه نوردلاوری دیر، او بیش ییل آلدین عایله سی بیلن بیرگه جوزجان ولایتی نینگ درزاب تومنی ده ناتینچلیک و قوراللی طالبان حضوری سبب شبرغان شهریده کیلدی و چکسیز سعی وحرکتی نتیجه سیده افغانستان ملی پولیسی صفی گه قوشیلدی.

نجیبه نی تقدیری افغانستان نینگ اوزاق توشکن وچکه قشلاق لریدن بیریده یوزبیرگن اینگ قیزیق حکایه لردن بیری دیر. نجیبه عایله سی نینگ کتته قیزی، او آنه سی، سینگلی لری و اوکه لری بیلن بیرگه او پیتده شبرغان شهریگه کیلدی که آته سی طالبان صفی ده بیرقوراللی طالب صفتیده دولت گه قرشی اورشردی. اما بو جسور قیز اوزی و عایله سی تقدیری نی اوزگرتیریش اوچون جسارت بیلن قرار آلدی.

ننشانه آژانسی نی شبرغان ده‌گی خبرنگاری بیربلوتلی توش ده نجیبه نوردلاوری حکایه سی نی عکس ایتریش مقصدی بیلن جوزجان ولایتی امنیه قوماندانلیگی تمان یولگه توشدی و اوتکن بیش ییل مدتی ده نجیبه قندای مشقت لرنی باشدن کیچیرگنی، قندای یوتوق لرگه ایرشگنی، کیله‌جکده قندای ریجه لری بارلیگی و قندای پولیس صفی گه قوشیلگنی دن تجربه کسب ایتکنی دن باخبر بولیش اوچون نجیبه نی دفتریگه باردی.

نجیبه بیرینچی دن قندای پولیس صفی گه قوشیلگنی حقیده بوندای سوزلرینی باشله‌دی:
” درزاب تومنی نینگ بیش ییل آلدینگی یمان وضعیتی و دولت نینگ قوراللی مخالف لرینی اهالی گه نسبتن باسیم و تزیق لری کوپیگنی سبب او ییردن چیقیب شبرغان شهریگه کیلیب ملی پولیس صفی گه قوشیلدیم. آتم طالبان صفی گه خذمت قیلردی.آتم بیلن کوپ تماس الیب و اوروش دن قول تارتیشی نی به تکرار التماس قیلدیم. آتم نهایت ده اوروش دن قول تارتیب صلح پروسه سیگه قوشیلدی. حاضر ایسه عایله سی یانیده عادی حیات کیچیرماقده”.

نجیبه نوردلاوری نی درجه سی ” لمری ساتنمن ” و جوزجان پولیس قوماندان لیگی نی جنایی مدیریتی ده عایله لر جنجاللرینی حل ایتیش بولیمی ده وظیفه بجره دی.
او سوزلرینی دوام ایتیریب ایتی :” امنیتی قوت لر دایره سیده عیال پولیس لربارلیگی اساسی ضرورت لردن بیری دیر و بیزعیاللر ایرکک پولیس لربیلن یان مه یان مردم میزگه خذمت قیله میز”.
اونگه کوره عیاللراگراولکه لریگه خذمت کورستماقچی بولسه لر پولیس صفی اینگ مناسب جای دیر.
عایلوی جنجللر، زوروانلیک و کلتکلنیش، حقارت واهانت قلیش بوکونگی کون ده عایله لرقرشی سیده تورگن دال ضرب قیینتچلیک لرجمله سیدن دیر و بیرقطارعایله لر، خصوصا عیال لرشوسبب دن پولیس گه مراجعه ایته‌دیلر.

لمری ساتنمن نجیبه پولیس صفیده قوشیلگنی دن بویان اوز خاطره و تاثیراتی نی بوندای بیان ایتی:” مین عایلوی جنجاللرنی حل ایتیش بولیمی ده ایش آلیب باریشیم دن و خصوصا هرکونی اقتصادی قیینتچلیک لر سبب کوپگینه معمالر و روحی و فزیکی شکنجه گه دچاربولگن عیال لر وضعیتی نی کوریب عذاب چیکه من اما بیز بو بولیمده بو جنجاللر و قیینتچلیک لرنی حل ایتیش ده سعی قیلیب مملکت قانونلریگه مطابق عمل قیله میز. کوپ حالت لرده بیزنینگ قانونی مصلحت لری میز اساسی ده عایله لر خطالرینی انگلب معما وجنجاللرینی برطرف ایته‌دیلر.
نجیبه نور دلاوری ۱۳۹۶ ییلی جوزجان ولایتی دن ترکیه بورسیه سیگه موفق بولگن یگانه عیال ایدی. او بیش آی ترکیه ده تعلیم کوردی. او عینی دمده اوز مسلکی بویچه افغانستان ایچکری سیده هم ایککی آی لیک، تورت آی لیک و آلتی آی لیک تعلیمی دوره لرده قتنشیب مسلکی قابلیت و مهارتلرینی اشیرگن.

بو عیال پولیس اوز وظیفه سی دن راضی ایکنلیگی دن علاوه اون کیشی لیک عایله سی روزغارینی هم تامین لیدی.او سینگلی و اوکه لرینی مکتب گه قویگن.نجیبه اوزعایله سی حیاتی حقیده ایتی :” بیز فقط پولیس اداره سیدن اله‌یاتگان آی لیک دن روزغاری میزنی تامین لی میز و هر ییلی هم ۵۰ مینگ افغانی دن عبارت بولگن تشویقی مکافات هم آله میز. شو مبلغ بیلن حیات میز حاضریخشی اوتیب بارماقده.

افغانستان کبی ناتینچ مملکت ده عیاللرفعالیتی اوهم پولیس صفیده، قندای بیر آسان ایش ایمس.نجیبه نور اما جسارت بیلن بوتوغریده اوزفکرینی بوندای بیان ایتی:” درزاب دن شبرغان گه کیلگنی میزدن سونگ قوراللی مخالف لرتمانیدن بی حد تهدید بولدیم، اما بو تهدید لرگه تسلیم بولمی ایشیم نی دوام ایتیردیم.بخت گه قرشی برچه ایکنزارلری میزو بار ویوق میزنی درزاب تومنی گه تشلب چیقدیک، اما هیچ قچان تسلیم بولمدم”.

بو پولیس نینگ عایله سینی درزاب تومنی ده ایکنزار، باغ و حویلی سی بارایدی اما حاضر بیش ییل اوتگنی دن سونگ حتی باغ نینگ کوچتلری هم اوروش سبب نابود بولگن.
بوکون لر افغانستان ده اوروش نی یکولنتیریش اوچون صلح وتینچلیک بحث لر قیزیق و بوندای بحث ومذاکره لر افغانستان اهالی سی وضعیتی ده توغریدن توغری تاثیری بار.
نجیبه دلاوی بیرپولیس اوله راق اوز نظرینی صلح وتینچلیک باره سیده بوندای بیان ایتی :” آرزولری میزگه ایرشیش اوچون صلح وتینچلیک اینگ یخشی یول دیر. دولت نینگ قوراللی مخالف لری هم بیزنینگ وطنداشلری میز دیر.یقین کیله‌جکده اولکه میزده صلح وتینچلیک برقرار ایتیلیشی گه امیدم بار”.

لمری ساتنمن نجیبه نور دلاوی نینگ یگانه آرزوسی تینچلیک تامین لنیشی و اوز آنه یورتیگه قتیب باریشی و درزاب تومنی نینگ مهر ومحبت دن توله فضاسیدن لذت کوریش و وطنداش لری بیلن تینچ فضاده یششی دیر.
نجیبه پولیس صفی ده‌گی وظیفه سی یانیده اویی ایشی نی هم بجره دی.
نجیبه نوردلاوری دنیاگه کیلگن درزاب تومنی ۴۰ ییل دن بیری اوروش اوتیگه یانماقده، اما فقط او بو اوزاق توشکن اولسواللیک ده کوپگینه مشقت لرنی چیده‌گندن سونگ، اوز حیاتی نی اوزگرتیریش گه موفق بولگن یگانه عیال دیر.

نجیبه نور دلاوری بو جمله معنی سی نی یارقین نمونه سی دیر؛ هیچ بیرمقصد آسان لیک بیلن قولگه کیلمیدی