ملي مدافعه وزيري اسدالله خالد دولت نينگ قوراللي مخالف لري اگر آتش كيسيم و تينچليك پروسيگه قوشيلمسه لر ، امنيتي قوتلر فعال مدافعوي حالت دن چيقشي دن آگاهلنتيرگن.

خالدجنابلري اوتكن كونن(يكشنبه ٧ثور) مزارشريف گه قيلكن سفريده ديدي طالبان گروهي زوروانليك لرني كميش هفته سيدن سونگ امنيتي قوتلرگه قرشي هجوملريني كوپيتيريب شدت بيرگن. اونگه كوره بو گروه تينچليك پروسه سيگه بيرگن وعده لريگه عمل قيلمگن.

افغانستان ملي مدافعه وزيرليگي سرپرستي شاهين و پامير قول اردولري قوماندان لري بيلن اوتكزگن اوچرشويده ديدي:” شمال نينگ امنيتي وضعتي كوريب چيقلدي و امنيتي قوتلر ضرورت بولگن تقدير ده دولت نينگ مخالف قوتلريگه قرشي هرقنداي عمليات يولگه قويش ده تيارديرلر.”

سونگي بير آي دن بويان طالبان گروهي امنيتي قوتلرگه قرشي هجوملريني شدت بيرگن. اما امنيتي قوتلر زوروانليك لركميش هفته سيدن سونگ( ٢ دن ٩ حوت) فعال مدافعوي حالت ني اختيار قيليب يالغيز طالبان هجوملريني دفع ايتماقده لر.

طالبان گروهي نينگ امنيتي قوتلرگه قرشي هجوملري نتيجه سيده عادي اهالي دن كوپ كيشي لر اوليب ياره لنگن. ايككي كون آلدين فارياب ولايتي المار و قيصار تومن لريده طالبان و امنيتي قوتلر ارا توقنشو نتيجه سيده عادي اهالي دن تورت كيشي اوليب ١٠ كيشي هم جراحتلندي.

عيني حالده شاهين قول اردوسي مطبوعات مسولي حنيف رضايي نشانه خبر آژانسي بيلن صحبت ده ديدي:” افغانستان ملي مدافعه وزيرليگي سرپرستي فعال مدافعوي حالت سخلنشي طرفداري دير، چونكه بو حالت افغانستان دولتي حسن نيتي ني  آتش كيسيم و صلح و تينچليك پروسيگه نسبتا” كورسته دي.” رضايي جنابلري علاوه ايتي اسدالله خالدجنابلري بلخ ولايتي گه قيلگن سفريده، اگر طالبان گروهي امنيتي قوتلرگه قرشي هجولريني شدت بيرسه لر امنيتي قوتلر بو گروه گه قرشي حربي عمليات يولگه قويش ده صلاحيتي بار ديب اظهار ايتكن.