بير ويديويي يغين سونگيده بو اوچ مملكت تمانيدن نشر ايتيلگن قوشمه اعلاميه ده دايمي آتش كيسيم گه ايرشيش و افغانستان سياسي كيله جگي باره سيده يول نقشه سي حقيده بحث بوليشي اوچون افغان لر ارا مذاكره لر باشلنيشي ضرور ايكني تاكيدلنگن.افغانستان، امريكا و اوزبيكستان اوچ تمان له مه بير يغين دن سونگ افغان لر ارا مذاكره لر تيزراق باشلنيشي ني بير قوشمه بيانيه ده تاكيدلشديلر.

بو قوشمه اعلاميه ده امريكا، افغانستان و اوزبيكستان دولت نماينده لري اوتكن كوني( چهارشنبه ٧ جوزا) ويديو كنفرانس آرقلي بو اوچ مملكت ارا اوتكزيلگن يغين حقيده بحث قيلديلر.بو يغين امريكا تشقي ايشلر وزيري اورين باسري ،افغانستان تشقي ايشلر وزيري سرپرستي محمد حميف اتمر و اوزبيكستان تشقي ايشلر وزيري عبدالعزيز كاملوف باشچيليگيده اوتكزيلدي.بو قوشمه اعلاميه ده اوچ مملكت اوز ارا همكارليك لريني كينگتيريش ده تاكيدلب افغانستان ده تينچليك اورنتيليشي و اوتكن ١٨ ييل يوتوقلري سخلنيشي اوچون دايمي سياسي كيليشو اوچون جهان و منطقه مملكت لريدن بو مملكت ده اوروش يكونلنيشي سعي و حركت لردن حمايت ايتيش لريني طلب ايتكن.

بو اوچ مملكت عيني دمده عبدالله و غني جنابلري ارا امضالنگن كيليشو و افغانستان ده هرتمان له مه حكومت تشكيل ايتيليشي و عالي مصالحه كينگاشي ايجاد ايتليشي ني آلقيشلگنلر.

بو قوشمه اعلاميه گه كوره بو اوچ مملكت اوتكن هيت كونلريده طالبان و افغانستان حكومتي ارا آتش كيسيم برقرار ايتيلگني ، محبوسلرني قويب يوباريليشي بويچه افغانستان حكومتي قراريني آلقيشلگنلر. اولر عيني دمده امريكا و طالبان ارا امضالنگن كيليشونامه گه اساسا طالبان محبوسلري قويب يوباريليشي ده تاكيدلشديلر.

بو يغين قتنشچي لري كروناويروسي گه قرشي كورشده اهالي ضرورتلريني تامين لش، كيرك بولگن طبي و ييمليك اشيالر انتقال بيريليشي اوچون چيگره لرده كيركلي قولي ليك لر مساعد ايتيليشي تاكيدلشديلر.

بو يغين سونگي ده اشتراكچي لر منطقه اي همكارليك لر دوام ايتيب باريشي ني طلب ايتيب بوهمكارليك لر تورلي زمينه لرده كينگيشني تاكيدلشديلر.