ایچکی ایشلروزیرلیگی مسوللری، مملکت ده زوروانلیک کمیشی هفته سیدن سونگ طالبان جنگچی لری هجومی اثریدن عادی اهالی ۵۲۳ کیشی قربان بولیب ۱۴۴ عادی اهالی هم یاره لنگن دیب اعلان ایتکن.

ایچکی ایشلروزیرلیگی سوزچی سی طارق آرین بوکون ( شنبه ۳جوزا) کابل ده بیرخبری یغین ده بو رقم نی اظهارایتب دیدی بو وطنداش لری میز خودکش هجوملر، پارتلش لرو یول چکه سیده اورنتیلگن و میقاطیسی ماین لر پارتلشی سبب اوزجانلرینی قولدن بیریب یاره لنگن لر. اونکه بو لراره سیده باله لر ، عیاللر و کیکسه لرهم داخل.

 ایچکی ایشلروزیرلیگی سوزچی سی شونینگ دیک طالبان عصیانچی لر اوتکن ۶ آی جریانیده مملکت نینگ ۱۴ ولایتی ده  ۱۱ عامه انشاعات نی نابود قیلگن دیب ایتی.  اونگه کوره شونینگ دیک بو هجوم لرنتیجه سیده ۴۱مکتب، ۶ شفاخانه، ۴۰ کوبریک ، ۱۵ برق پایه سی، ۵ مخابراتی کمپنی آنتنی و نیچه مسجد تخریب بولگن.

  باشقه تماندن مملکت ملی خوفسیزلیک کینگاشی هم بوکون ( شنبه ۳جوزا) یالغیز رمضان آی ده طالبان هجوملری نتیجه سیده عادی اهالی دن ۱۵۶ کیشی اولدیریلیب و۴۳۰ کیشی یاره لنگنی نی اعلان ایتی.

عینی حالده اوتکن شمسی ییلی ( ۱۳۹۸) حوت آیی اوچنچی کونیدن اونمچی کونیگه قدر طالبان گروهی امریکا قوشمه ایالت لری طلبی گه مطابق زوروانلیک لرنی مملکت بویلب کمیتیردیلر.زوروانلیک لرنی کمیتیریش امریکا و طالبان ارا صلح کیلیشو امضالنیشی اوچون افغانستان و امریکا حکومتلری نی اساسی شرطی ایدی.