اوتكن ايككي هفته جريانيده طالبان گروهي هجوملري آرتكني و يمگان و جرم تومني نينگ ايريم قسملري طالبان نطارتي گه اوتكني دن سونگ بدخشان امنيتي و مدافعوي مسوللري حربي عمليات باشلنگني دن خبر بيرگن لر.

بدخشان ولايت حاكمي سوزچي سي نيك محمدنظري، بو حربي عمليات ايككي كون آلدين طالبان قوراللي لري هجومي آرتكني دن سونگ باشلنگن ديدي. نظري جنابلري بو عمليات عاقبتيده امنيتي قوتلر،طالبان تصرف ايتكن برچه منطقه لرني قيته تصرف ايتكني ني تاكيدلشدي.

نظري جنابلريگه كوره بو عمليات ده”آب راغك” ، ” فرغاميرو” و” دهن آب خستك” منطقه لري امنيتي قوتلر نظارتي گه اوتكني دن علاوه باشقه بير قطار منطقه لر خصوصا “پل سوچ” و تورت كون آلدين طالبان تصرف ايتكن تورت امنيتي پوسته هم بو گروه نظارتي دن چيقاريلگن.

بدخشان ولايت حاكمي سوزچي سي عمليات ده قوراللي طالبان گه آغير تلفات يتكزيلگني ني ايتيب اما بو باره ده تفصيلات بيرمدي.

بدخشان امنيه قوماندان ليگي سوزچي سي ثناءالله روحاني هم ديدي طالبان بير آي دن بيري صلح مذاكره لري، زوروانليك لرني كميشي و امنيتي قوتلر مدافعوي حالت ني اختيار قيلگن لريدن سو استفاده قيليب نيچه اولسوال ليك گه قرشي هجوملري ني كوپيتيرديلر.

بدخشان امنيه قوماندان ليگي سوزچي سي علاوه ايتي:” هرچند بدخشان نينگ نيچه تومنيده طالبان هجوملري دفع ايتيلدي اما هلي هم قوراللي طالبان جنگچي لريني اوروش ميدانلريده حضوري بدخشان امنيتي گه قرشي جدي تهديد سنله دي”. اونگه كوره حربي قوتلر شوني اوچون بو ولايت ده تازه لش عمليات يولگه قويب طالبان باسيب آلگن منطقه لرني قيته آليش گه سعي قيلماقده لر.

باشقه تماندن بدخشان مدني فعاللريدن بيري عبدالبصير وثيق اوتكن نيچه ييل دن بيري وقتينچه ليك عملياتلرني يولگه قويليشي منطقه ني طالبان دن تازه لش اوچون فايده لي ايمسليگي ني تاكيدلشكن.اونگه كوره خارجي تروريستلر و طالبان جنگچي لريني مهم قرارگاهي بولگن”دره خستك” منطقه سي تازه لنمسه بدخشان ولايتي ني طالبان دن بوتكل تازه لش اوچون هرقنداي حربي عمليات نتيجه سيز ايكني ني اورغوليدي.

وثيق جنابلري، طالبان جنگچي لري اوتكن هفته ده گي هجوملريده امنيتي قوتلردن ييترليچه قورال يراق لرني آلگن ديب ديدي:”اگر بو عمليات توختتيلسه، طالبان قولگه كيريتكن قورال يراق لر بيلن بدخشان ولايتي گه كتته هجوملرني ريجه لشتيريب بو ولايت خوفسزليگي گه خلل يتكزه آله ديلر”.

اما بدخشان امنيتي مقاملري، طالبان گروهي بوولايت نينگ ايريم حدودلريده هجوملريني اويشتيريش بيلن صلح و تينچليك بويچه وعده لريگه عمل قيلمي ديلر ديب ايتيشماقده لر. امنيتي مقاملر يولگه قويلگن جاري حربي عمليات طالبان هجوملريگه جواب و بدخشان ني طالبان دن تازه لش اوچون بجريلماقده ديب ايتكن لر.

امريكا و طالبان ارا امضالنگن صلح كيليشوي گه اساسا” بو گروه زوروانليك لر ميزاني ني مملكتده كمتيرماقچي ايدي. عيني دمده افغانستان دولتي هياتي بيلن توغريدن توغري مذاكره ني باشلش بوگروه نينگ باشقه بير وعده سي ايدي كه حاضرگه قدر عملي بولمگن. امنيتي قوتلر مسوللريگه كوره طالبان نه فقط اولكه ده زوروانليك لر ميزاني ني كوپيتيرگن، بلكه زوروانليك لر كولمي امريكا بيلن صلح كيليشو امضالنگن دن آلدينگي وقت لردن كوره شدت آلگن.

طالبان گروهي، افغانستان دولتي بيلن مذاكره باشلش اوچون بيش مينگ محبوسلري قويب يوباريليشي ني شرط قويگن، هرچند حكومت بو گروه محبوسلري ني قويب يوباريش اوچون ايريم آديم لرني كوتارگن اما اوروش و زوروانليك لرني كميتيريليشي اوچون بو گروه تمانيدن قنداي بير عملي آديم كوتاريلمگن.