کرونا ویروسی ییرلیشی آلدینی آلیش اوچون محلی اداره تمانیدن جوزجان ولایت مرکزی شبرغان شهری و بو ولایت نینگ اون اولسوال لیگی ده اهالی گه معلومات یتکزیش کمپاینی نی باشلنگن.

بو کمپاین جوزجان ولایتی مدنیت وخبر اداره سی تمانیدن باشقریلماقده. بو اداره ملازملری جوزجان ولایت یشوچیلری نی کرونا ویروسی خطرلریدن آگاهلنتیریش اوچون اوی مه اوی و مسجد مه مسجد مراجعه ایته دیلر.

جوزجان ولایتی مدنیت وخبر اداره سی ریسی عظیم الله رحمانیار نشانه خبرآژانسی بیلن صحبت ده دیدی:« اهالی گه معلومات یتکزیش کمپاینی شبرغان شهری بیرقطار مسجدلری و کوچه لریده و شونینگ دیک جوزجان ولایتی ایریم تومن لریده مدنی جماعه رضاکارلری تمانیدن عملگه آشیریله دی.» رحمانیار جنابلری علاوه ایتی رضاکارلر بو کمپاین ده برچه مسجدلرنی ضدعفونی قیلیب و بو مسجد متقتدی لری و اهالی اویلریگه باریب مردم گه نقاب و معلوماتی ورقه لرنی ترقته دیلر.

جوزجان مدنیت و خبر اداره سی ریسی شونینگ دیک بو کمپاین جریانیده، شبرغان شهریده اونلبچه بلبورد لرقیستیریلگن دن علاوه قریب اون مینگ معلوماتی ورقه جوزجان مرکزی و تومن لریده مردم گه ترقتیلیشی نی تاکیدلشدی.

 جوزجان ولایتی بیرقطار دین عالم لری هم بو کمپاین دن حمایت لرینی اعلان ایتیب مردم کرونا ویروسی گه قرشی کورشده دولت ومدنی جماعه اعضالری بیلن همکارلیک قلیش لری و عامه ساغلیک وزیرلیگی توصیه لریگه عمل قلیش لری لازم دیب اعلان ایتکن.

جوزجان ولایتی دین عالم لرکینگاشی ریسی مفتی مجهزجنابلری دیدی:« بیز منبرلر آرقلی کرونا ویروسی نی جدی توتیش نی مردم گه ایتدیک و بو ولایت دین عالم لر کینگاشی، جوزجان ولایتی حج و اوقاف اداره سی هدایتی گه مطابق بو ساحه ده ایشلش و همکارلیک قلیش ده تیاردیر.»

 جوزجان محلی رسملریگه کوره اگرشبرغان شهریده میوه ساتوچی و دستفروش لر بازاریده‌گی گوجوملیک کمیمسه جوزجان ولایتی یشوچلری کرونا ویروسی فاجعه سی بیلن یوزمه یوز بولیش لری ممکن.

عینی حالده اوتکن کونی( دوشنبه ۸ ثور) جوزجان ولایتی قاره لوچی اداره سی بوولایت نینگ چیت ده یشه یاتکان بیرقطار خییروطنداشلری مالی یاردمی بیلن، ۳۰۰ عایله گه آذوقه وییملیک اشیا ترقتگن. بو یاردم لر عموماٌ قرنطینه نی رعایت قیلگن قشاق و حاجتمند عایله لرگه ترقتیلگن.

 جوزجان ولایتی ساغلیک نی سخلش مسوللری معلوماتی گه اساساٌ کرونا ویروسی اولکه ده تاپیلگنی دن حاضرگه قدر بو ولایت ده ۱۰ مثبت واقعه رویخط ده آلینگن. بو اون واقعه دن بیرکشی عالم دن اوتکن و ۹ کیشی هم حاضر کووید۱۹ مخصوص کسلخانه سیده دوالنماقده.