جوزجان ولایتی امنیتی مسوللریگه کوره بیرحربی عملیات نتیجه سیده بوولایت نینگ خم‌آب تومنی طالبان گروهی نظارتی ده چیقاریلگن.

 جوزجان ولایت حاکم لیگی مطبوعات بولیمی مسولی معرف آذر، بوکون ( شنبه ۲۳ حمل) نشانه خبرآژآنسی بیلن صحبت ده دیدی:« اوتکن کیچه باشلنگن حربی عملیات عاقبتیده بوکون ایرته لب خم‌آب اولسوال لیگی مرکزی و اولسوال لیگ نی امنیه قوماندان لیگی بناسی امنیتی قوتلرنظارتی گه اوتدی.»

آذرجنابلرینی ایتیشیچه طالبان گروهی و امنیتی قوتلرارا یوزبیرگن توقنشو نتیجه سیده طالبان قوماندانی ملا عبدالرحیم داخل بو گروه نینگ تورت جنگچی سی اولدیریلیب و ۷ اعضاسی هم جراحت کورگن. طالبان گروهی حاضرگه قدر بوباره ده بیران نرسه ایتمگن.

 جوزجان ولایتی امنیتی مسوللری شونینگ دیک خم‌آب تومنی حدودیده «شاهین ۲۲۴» ناملی یویلگه قویلگن حربی عملیات نتیجه سیده حاضرگه قدر بوتومن نینگ بیش قشلاقی دولت مخالف لریدن تازه لنگنی نی تاکیدلشکن.

جوزجان ولایت حاکم لیگی مطبوعات بولیمی مسولی عینی دمده بو عملیات ده امنیتی قوتلرگه هیچ قندای صدمه یتکزیلمگنی نی اورغولشدی.

ترکمنستان بیلن چیگره داش بولگن، خم‌آب تومنی جوزجان ولایتی نینگ ناتینچ اولسوال لیگی دیر. آمو دریا قیرغاغیده جایلشکن بو اولسوال لیک بوندن ایککی ییل آلدین طالبان نظارتی گه اوتکندی.