افغانستان عامه ساغلیک وزیرلیگی نشرایتکن معلوماتی گه کوره کووید۱۹ ویروسی نینگ ایلک مثبت واقعه سی جوزجان ولایتی ده رویخط ده آلیندی. جوزجان عامه ساغلیک اداره سی مسول لریگه کوره کرونا ویروسی نی یوقتیرگن بو جوزجان لیک شخص ۳۹ یاشده بولگن بیرایرکک دیر.

عامه ساغلیک وزیرلیگی سوزچی سی وحیدالله مایارنی ایتیشیچه اوتکن ۲۴ ساعت دوامیده سکیز ولایت ده ۶۳ مثبت واقعه رویخط ده آلینگن. عینی حالده جوزجان ولایتی عامه ساغلیک اداره سی باشلیغی فرید عزیزی نشانه خبرآژانسی گه دیدی کرونا ویروسی نی یوقتیرگن بو شخص جوزجان ولایتی درزاب تومنی یشوچی سی دیر و تازه لیک ده ایران دن قیتیب کیلگن. عزیزی جنابلری بو بیمار حاضرچه شبرغان شهری نینگ کووید۱۹ شفاخانه سیده یاتقیزیلگنی دن خبربیردی. بو شخص عایله سی بیلن نیچه مدت دن بیری شبرغان شهریده حیات کیچریب کیلماقده.

 بوندن بیرکون آلدین ( شنبه۳۰ حمل) جوزجان ولایت حاکمی اورین باسری عبدالقادرمالیه جوزجان ولایتی نینگ شبهه لی واقعه لری نتیجه لری اعلان بولمسلیگی دن شکایت ایتکندی. اونی معلوم قیلیشیچه اون کون آلدین بو ویروس نی یوقتیریش گه شبهه لی بولگن شخص لر نمونه لری مزارشریف شهریگه جونتیلیب اما نتیجه سی حاضرگه قدر معلوم ایمس دیب ایتکندی.

حاضرچه بوتون مملکت ده ۹۹۳ کیشی کرونا ویروس نی یوقتیرگنی ۳۲ ولایت ده ثبت بولگن.