خلق ارا قوتقرو كميته سي افغانستان ده كرونا ويروسي ييرليشي دن آگاهلنتيرگن. بو كميته گه كوره افغانستان بو جهت دن بير انساني فاجعه گه يوزمه يوز دير.

بو كميته نشرايتكن راپوريده افغانستان ده كرونا ويروسي سينويني اوتكزمگن بيمارلر ساني بي حد كوپيگني و بو ويروس ني يوقتيرگن كيشيلر نمونه لري لابراتورده تيكشيريلمس ليگي سبب انيق لنمي قالماقده لر ديب ايتكن. قوتقرو كميته سي علاوه ايتكن يالغيز اوتكن ميلادي آي جريانيده كرونا ويروسي ني يوقتيرگنلر ساني  افغانستان ده ٥٠ فايزدن كوپراق كوپيگن.

بو آگاهلنتيريش اونداي بيرحالده اورته گه قويلگن كه افغانستان عامه ساغليك وزيرليگي مسوللريگه كوره بو وزيرليك هر كون ده ايككي مينگ نمونه ني تيكشيريش امكانيتي گه ايگه دير اما هر كوني ١٠ دن ٢٠ مينگ نمونه بو وزيرليك گه يوباريله دي. قوتقرو كميته سي بو باره ايتكن كتته احتمال بيلن كرونا ويروسي ني يوقتيريش گه شبهه لي بولگن كيشي لردن ٩٠ فايزي تيكشيريلمي قاله دي.افغانستان ده كرونا ويروسي واقعه لري اوتكن آي لرگه قرگنده كوپيگن. عامه ساغليك وزيرليگي نشر ايتكن رقم لرگه اساسا” حاضرگه قدر ١٥ مينگ و ٧٥٠ كيشي كرونا ويروسي ني يوقتيرگن. بو آره دن ٢٦٥ كيشي اوزجاني ني قولدن بيرگن و ١٤٢٨ كيشي هم ساغلگن.