امريكا قوشمه ايالتلري ني افغانستان تينچليگي اوچون مخصوص نماينده سي ينگي دوره سفريني قطر، پاكستان، افغانستان، ناروي و بلغاريا ده باشله دي.

امريكا تشقي ايشلر وزيرليگي اعلاميه سيگه كوره خليل زادجنابلري نينگ بو دوره سفري ايككي كون آلدين ( جمعه ٣ اسد) باشلنگن.

خليل زادجنابلري نينگ بو دوره سفريدن مقصد دوحه و كابل ده افغانلر ارا مذاكره لر يولي اوستيده قالگن معمالرني حل ايتيش و خصوصا قالگن محبوسلرني قويب يوباريليشي و زوروانليك لرني كميتيرش يوللرني كوريب چيقيليشي بولگن.

امريكا قوشمه ايالتلري تشقي ايشلر وزيرليگي اعلاميه سيگه كوره خليل زاد جنابلري اسلام آباد ده افغانلر ارا مذاكره لر يونليشي ده پاكستان حمايتي ني قولگه كيلتيريش دير و اسلو صوفيه ده ناتو تشكيلاتي اعضالريگه افغانستان تينچليك مذاكره لري حقيده تفصيلات بيره دي.

امريكا تشقي ايشلر وزيرليگي بو اعلاميه ده تاكيدلشكن برچه تمانلر باشقه هر وقت دن كوره كوپ راق افغانستان ده ٤٠ ييل اوروش ني يكونلنتيريش اوچون اوته مهم بولگن باسقيچ گه يعني توغريدن توغري مذاكره لر باشلنيشيگه يقينلشكنلر.

عيني حالده مملكت بويلب زوروانليك لر كوپيب باريشي آرتيدن طالبان گروهي اعلان ايتكن كه اگر افغانستان دولتي بو گروه تمانيدن دولت اختياريگه قويلگن محبوسلر رويخط گه اساسا قربان هيتي گه چه بو گروه نينگ قالگن محبوسلريني قويب يوبرسه طالبان گروهي قربان هيتي دن سونگ صلح مذاكره لرني باشلش ده تياردير.

اما افغانستان دولتي بوگروه نينگ ٥٩٢ محبوسي ني آغيرجرم لرني بجريش ده دخلدار بولگنلري اوچون قويب يوبارمسليگي ني اعلان ايتكن.