طالبان هجوملری کوپیگنی؛ اوتکن اوچ کونده طالبان نینگ ۲۰ جنگچی سی اولدیرلدی
neshananews
02 May 2020بدخشان محلی رسمیلریگه کوره طالبان گروهی نینگ جرم و نسی توملریده هجوملری کوپیگنی و بو هجوملرگه قرشی امنیتی قوتلر جوابلری آرتیدن بیرقطار خارجی جنگچی لر داخل طالبان گروهی جنگچی لریدن ۲۰ کیشی اولدیریلگن.
بدخشان ولایت حاکمی سوزچی سی نیک محمد نظری نشانه خبر آژانسی بیلن صحبت ده، طالبان گروهی اوتکن اوچ کون مدتیده نسی تومنی مرکزی و جرم اولسوال لیگی نی « آب راغک » و « دهن آب خستک » قشلاق لریگه قرشی هجوم اویشتیریب اما امنیتی قوتلر تمانیدن بو هجوم لر دفع ایتلیب و ایککی تمان ارا یوز بیرگن توقنشو نتیجه سیده طالبان گروهی آغیر تلفات کوریب آرقه گه چیکینگن دیدی.
اونی معلوم قیلیشیچه اوتکن اوچ کون مدتیده امنیتی قوتلر و طالبان جنگچی لر ارا یوز بیرگن جنگ لرده بوگروه نینگ ۴۰ دن کوپراق جنگچی لری هلاک و یاره لنگن. نظری جنابلری علاوه ایتی:« نسی اولسوال لیگی ده طالبان نینگ مشهور قوماندانی مخدوم معراج داخل ۱۲ جنگچی سی و جرم تومنی ده هم اکثریتی خارجی جنگچی لر بولگن بو گروه نینگ ۱۲ جنگچی سی هلاک بولگن.»
بدخشان ولایت حاکمی سوزچی سی علاوه ایتی بو توقنشولرده جرم اولسوال لیگی ده طالبان جنگچی لریدن ۱۲ کیشی و نسی تومنی ده هم بو گروه نینگ نسی تومنی اوچون تعین لنگن تومن حاکمی داخل ۵ جنگچی سی یاره لنگن. اونگه کوره بو توقنشولرده امنیتی قوتلرگه هیچقندای صدمه یتکزیلمگن.
بدخشان ولایتی محلی و حربی مسوللری طالبان گروهی جنگچی لری هجوملری کوپیگنی نی امریکا بیلن امضالنگن صلح بیتیمی گه قرشی ایکنی نی اورغولشگن لر. طالبان گروهی نینگ بدخشان تومنلرینی تصرف ایتیش مقصدی بیلن هجوم لری اوندای بیرحالده کوپیگن که امنیتی قوتلرحاضرگه قدر « فعال مدافعوی» حالت دن چیقمگن لر.
عینی حالده بدخشان مدنی فعاللری طالبان گروهی هجوم لری کوپیگنی دن تنقیدلب دیدیلر طالبان گروهی نینگ بو عملی اولکه ده دشمن لیک و انتقام آلیش حسی نی کوپیترگن و بوندای حرکت لر اولکه ده صلح پروسه سیگه صدمه یتکزیشی ممکن. مدنی فعال عبدالبصیروثیق دیدی:« طالبان گروهی صلح کیلیشوگه مطابق زوروانلیک لرنی کمیتیریش لری کیرک و افغان لرارا تینچلیک مذاکره لری باشلنیشی بیلن مملکت ده دایمی صلح وتینچلیک زمینه سی نی یرتیش لری لازم.» وثیق جنابلری دیدی هرچند امنیتی قوتلر فعال مدافعوی حالت دیرو طالبان گروهی گه قرشی هیچقندای عملیات نی یولگه قویمگن اما طالبان هجوملری کوپیگنی بو گروه نینگ تینچلیک گه قرشی ایکنی دن دلالت بیره دی.
بدخشان ولایت کینگاشی اعضالری هم امنیتی قوتلر فعال مدافعوی حالت ده ایکن لیگی سبب طالبان گروهی مورالی کوتاریلگن دیب و شونی اوچون هرکون امنیتی قوتلر پوسته لریگه هجوم اویتشیرماقده لردیب تاکیدلشکن. ولایت کینگاشی اعضاسی احمدجاوید مجددی دیدی صلح بیتمی امضالنگن دن آلدین بدخشان ولایتی جغرافی حدودیده کتته قسمی امنیتی قوتلرنظارتی آستیده ایدی و طالبان گروهی نینگ جرم، وردوج، یمگان و کران و منجان اولسوال لیک لریده‌گی مهم قرارگاه لری نابود بولگندی.اما اوتکن بیر آی جریانیده و طالبان هجوملری کوپیگنی آرتیدن یمگان تومنی و جرم اولسوال لیگی ایریم حدودلرینی طالبان قیته اوز نظارت لری آستیده کیرتکن و بدخشان یشوچیلری هر کونی بو ولایت قانلی اوروش لرگه گواه بولیب کیلماقده لر.
مجددی جنابلری امنیتی قوتلردن هوایی حمایت لر توختتیلگنی و بو وقتلر تمانیدن وقتینچه لیک حربی عملیات لریولگه قویلگنی دن تنقیدلب دیدی:« اگر حکومت ناتینچ منطقه لرنی عصیانچی گروه لردن تازه‌لش اوچون منتظم عملیات لرنی یولگه قویمسه امنیتی قوتلرگه قرشی طالبان گروهی هجوملری دوام ایته بیره‌دی.»
اونگه کوره، امنیتی قوتلرنی فعال مدافعوی حالت ده ایکنی، طالبان گروهی گه بو فرصت نی مساعد ایتکن که هجوملرینی کوپیتیریش و امنیتی پوسته لرنی باسیب آلیش بیلن کوپلب حربی اسباب اسکونه لرگه قول تاپماقده لر. بدخشان ولایت کینگاشی بو اعضاسی تاکیدلیدی:« بوندن بیرآی آلدین طالبان گروهی جرم تومنی نینگ بیرقطار قشلاق لریده نیچه استقامت دن هجوم اویشتیریب امنیتی قوتلرگه کوپ تلفات یتکزدیلرو نیچه پوسته نی باسیب الیش بیلن کوپ مقدارده قورال ویراق قولگه کیلتیردیلر.» مجددی جنابلری اگر خارجی تروریست لرنی ییریک و مهم قرارگاهی بولگن « خستک دره » سی بو جنگچی لردن تازه‌لنمسه بو ولایت ده ناتینچلیک کوپیشی و طالبان حرکت لری آرتیب باریشی خطری کوپراق بولیشی ممکن دیدی.بدخشان ولایتی نسی تومنی یشوچیلری هم طالبان گروهی نینگ هجوملری بوتومن ایریم حدودلریده کوپیگنی سبب بو تومن یشوچیلرینی تورلی خیل قیینتچلیک لرگه دچار قیلگن دیدیلر. نسی تومنی اهالیسیدن بیری حمیدالله دیدی بو تومن ده طالبان حضوری سبب تاجیکستان مملکت اهالی سی یوزیده چیگره ده‌گی کوبریک لرنی یاپدی . اونگه کوره مردم افغانستان بازارلری مسافه سی اوزاق بولگنی اوچون کونده لیک احتیاج لری نی تامین لشه آلمیدلر و حاضر بو منطقه ده آذوقه کمچلیگی یقال سیزیلماقده. نسی تومنی بو یشوچی سی بدخشان ولایتی تومنلرینی طالبان جنگچی لریدن تازلنیشی نی حکومت دن طلب ایتیب اگر بو ایش بولمه سه چیگره ده جایلش کن بو حدودلراهالی سی نی آچلیک و قحط لیک تهدید ایتماقده دیب آگاهلنتیرگن.
هرحالده بدخشان محلی رسمیلری، امنیتی قوتلر بدخشان نینگ برچه ناتینچ منطقه لریده حضوریدن و فعال مدافعوی حالت دایره سیده طالبان نینگ گروهی نینگ اوروش جغرافی سی کینگیشی آلدینی آلیش دن اهالی گه ایشانچ بیلدیرماقده لر.
