هرات ولایتی برق یتکزوچی شرکت مسووللرینی ایتشیچه ایران دن وارد بولگن برق پایه لریدن بیرینی پارتلتیلگنی سبب شهرنینگ بیر کاتته قسمی برق انرژی سی کیسیلیب قالگن.حاضرچه هرات شهری یریمی نینگ برقی نوبت شکلیده یتکزیلماقده.

هرات ولایتی برشنا شرکتی مطبوعات بولیمی مسوولی زینب محسنی نشانه خبر آژانسی بیلن صحت ده دیدی طالبان جنگچی لری اوتکن کیچه ( یکشنبه ۶ میزان) غوریان تومنی نینگ کلاته منطقه سیده بیر برق پایه  سینی پارتلتکن. محسنی خانم بو برق پایه سی پارتلتیلگنی بیلن ایران دن وارد بولگن برق انرژی سی مقداری کورگه کورنرلی درجه ده کیمگن و شو سبب دن هرات شهر یریمی گه برق نوبت شکلیده یتکزیلماقده.

ایران دن وارد بولگن برق انرژی سی هرات ولایتی صنعتی شهرچه سی برقی نی تامین لوچی اصلی منبع دیر. ایران دن وارد بولگن برق ولتاژی کیمگنی بو شهرچه ده فعالیت قیله یاتکان کوپلب کارخانه لرایشی گه جدی صدمه یتکزگن. اما خانم محسنی برشنا شرکتی تخنیکی گروه لری بو پایه نی قیته تیکلش اوچون تیارگرلیک کوریب تیزلیک ده پایه نی تعمیرقلیش اوچون حادثه محلی گه جونتیله دیلر دیب ایتکن.

هرات و اونی بیرقطار تومن لری برق انرژی سی ایران و ترکمنستان دن وارد بوله یاتکان برق دن تامین لنه دی. طالبان انده سنده بو ایککی مملکت ده کیلتیریلگن برق پایه لرینی نشان گه توتیب ولایت یشوچی لریگه قیینتچلیک توغدیره دیلر.