ملي خوفسيزليك كينگاشي دفتري و طالبان گروهي، كابل ده ايككي تمان نينگ تخنيكي هياتلري محبوسلرني قويب يوباريليشي بويچه ايش باشله گني ني تصديق لشكن.

مملكت خوفسيزليك كينگاشي سوزچي سي جاويد فيصل تويترصحيفه سيده، طالبان نينگ بير تخنيكي هياتي كابل گه كيلگيب و حكومت تخنيكي هياتي بيلن ايككي تمان محبوسلريني قويب يوباريليشي بويچه ايشله ماقده لر ديب يازگن. عيني حالده طالبان دفتري نينگ سوزچي سي سهيل شاهين تويترده بوگروه نينگ بيرهياتي طالبان محبوسلرني انيقلش اوچون كابل گه جونتيلگن ديب يازگن.

افغانستان حكومتي حاضرگه قدر طالبان گروهي نينگ ايككي مينگ محبوسي ني قماقخانه لردن قويب يوبارگن.طالبان گروهي هم حاضرگه چه دولت محبوس لريدن ٢٦١ كيشي ني آزاد قيلگن.

ملي خوفسيزليك كينگاشي بوندن آلدين طالبان جنگچي لريني قويب يوباريليشي ده آتش كيسيم دوام ايتيشي ضرور ديگندي.عيني حالده ايريم خبرلرگه كوره افغانستان حكومتي تمانيدن ٩٠٠ محبوس قويب يوباريلگن دن آرتيدن هيت دن سونگ بير هفته ليك نارسمي آتش كيسيم بير هفته گه چه اوزيتيريلگن.طالبان گروهي سوزچيسي ذبيح الله مجاهد اوتكن كوني شام( چهارشنبه ٧ جوزا) بوكون ده دولت قوتلريگه قرشي بو گروه تمانيدن هيچ بير عمليات و هجوم بولمگن ديب ايتكن.حاضرگه قدر هيچ تمان رسمي آتش كيسيم برقرار بولگني ني تصديق لشمگن.