فارياب ولايتي مركزي ميمنه شهريده يشه ياتگان بيرمينگ دن كوپراق آواره و قشاق عايله لرگه نقد پول ياردم ترقتيلدي.

فارياب ولايت حاكمي نقيب الله فايق ني رسانه لرگه ايتيشيچه بير انيق تيكشيرودن سونگ ١٠٤٥ عايله گه باله لردن حمايه ايتوچي موسسه سي تمانيدن تورت باسقيچ ده نقد پول ترقليشي ريجه لنگن، بولردن ٦٠٠ عايله سي آواره بولگن عايله لردن عبارت.

بو ياردم لر كيله سي تورت آيي گه قدر دوام ايتيب قيش موسومي گه ضرورت بولگن احتياج لريني تامين لش اوچون هرعايله گه ٦٦٣٠ افغاني بيريله دي ديدي.

فارياب ولايتي پشتونكوت تومني دن آواره بولگن صديقه، كونده ليك حيات ني اوتكزيش اوچون هيچ نرسم يوق و بو قهرتان قيش موسوميده سرپناه سيز يششي ني ايتيب و بوكون قولگه كيلتيرگن مبلغ بيلن نيچه كونليك حياتي ميز ضرورت لريني تامين لي  آله ميز ديدي.

افغانستان شمالي ولايت لريده دوام ايتيب باره ياتگان اوروش و ناتينچليكلر سبب كوپلب عايله لر اوي جاي لريدن آواره بوليب ولايت مركزي ميمنه شهريده آغير احوال ده كون كيچيرماقده لر.

بو ياردم لردن بهرمند بولگن عمران الله هرچند قيينتچيليگي ميز بي حد كوپ اما شو مبلغ جاري قيش موسومي ده بيرقطار كمچيليك لري ميزني برطرف ايته دي ديب اولكه ده تينچليك تامين لنيشي و اوز اوي و جاي ميزگه قيتيب باريشيميزني ارزو قيله من ديدي.

فارياب ولايت حاكمي آواره لر وضعيتي دن تشويش بيلديريب ياردم يتكزوچي ارگان لردن كوپراق ياردم بوليشي ني ايسته دي.

فايق جناب لري عيني دمده ميمنه شهري اطرافيده كون كيچيره ياتگان بير قطار آواره عايله لرگه آذوقه ياردم بولگني هم دن خبر بيردي.